Ўзбекистонликлардан пул талаб қилиб келган Қирғизистон чегарачилари ушланди
Чегарадан ўтаётган фуқаролардан тизимли равишда пул ундириб келган Қирғизистоннинг "Достук-автодорожний" назорат-ўтказиш пункти ходимлари қўлга олинди.
Бу ҳақда 24.kg нашри Миллий хавфсизлик давлат қўмитасига таяниб хабар қилди. Таъкидланишича, Ўзбекистон фуқаролари ва оғир юк машиналари ҳайдовчилари улардан энг кўп жабр кўрган.
“19 октябрь куни “Достук-автодорожний” НЎП бошлиғи А.Э., Қирғизистон МХДҚ Ўш вилояти бошқармаси бошлиғи Ч.Н., шунингдек директорнинг биринчи ўринбосари — МХДҚ Бош штаби бошлиғи Курсанбек Бекташев қўлга олинди. Улар МХДҚ Ўш ва Ўш вилояти бошқармасининг вақтинча сақлаш изоляторига жойлаштирилди”, — дейилади хабарда.
Қўлга олинганлар Чегара хизматининг айрим раҳбарлари ҳомийлиги остида фаолият юритган.
Эслатиб ўтамиз, аввалроқ қирғиз-тожик чегарасидаги вазият ҳақида ва “Толибон”дан қочган 20 га яқин афғонистонлик Тожикистон ҳудудига ўтгани хабар қилинганди.
Баҳринисо Мадумарова
