Европа футбол оқшомида қандай натижалар қайд этилди?

 

 

Хусусан, энг қизиқарли ўйинлардан бири "Ливерпул" — "Атлетико" жамоалари иштирокида бўлиб ўтди. Дастлаб иккита тўп билан олдинга чиқиб олган инглиз клуби кейинчалик иккита тўп ўтказиб юборди. Иккинчи бўлимда "Атлетико" ҳужумчиси Антуан Гризман майдондан четлатилганидан сўнг "Ливерпул' рақиб дарвозасини яна бир бор ишғол қилди.

 

Шу тариқа инглиз жамоаси 9 очко билан гуруҳда етакчилик қилаётган бўлса, "Атлетико' 4 очко билан иккинчи поғонадан жой олди. Гуруҳнинг "Милан" — "Порту" учрашувида эса "Порту" клуби 1:0 ҳисобда ғалаба қозонди ва гуруҳда учинчи ўринга кўтарилди. "Милан" ҳозирча умуман очко жамғара олмаган.

 

Кеча, шунингдек, "ПСЖ" — "РБ Лейпсиг" ўйини ҳам қарама-қаршиликларга бой бўлди. Ўйиннинг биринчи бўлими 1:1 ҳисобида якунланганидан сўнг, иккинчи бўлим бошида немислар ҳисобда олдинга чиқиб олишга муваффақ бўлди. Бироқ Мессининг 67 ва 74-дақиқада киритган голлари Париж клубига ғалаба келтирди.

 

Гуруҳнинг иккинчи ўйинида "Манчестер Сити" "Брюгге" устидан 5:1 ҳисобида устун келди. Мазкур гуруҳда "ПСЖ" 7 очко билан биринчи бўлиб турган бўлса, "Манчестер Сити" 6 очко билан иккинчи, "Брюгге" 4 очко билан учинчи ўриндан жой олган. "РБ Лейпсиг" ҳисобида ҳозирча умуман очко йўқ.

 

Шунингдек кеча "Интер" — "Шериф"ни 3:1 ҳисобида мағлуб этган бўлса, гуруҳнинг иккинчи ўйинида "Реал Мадрид" "Шахтёр" жамоасидан 5:0 ҳисобида устун келди. Бу гуруҳда "Шериф" ва "Реал Мадрид" 6 очко билан биринчи, иккинчи ўринларни банд этган бўлса, "Интер" 4 очко билан учинчи, "Шахтёр" 1 очко билан тўртинчи ўриндан жой олган.

 

Бундан ташқари кеча оқшом "Бешиктош" — "Спортинг" ўйинида 1:4 ҳисоби қайд этилган бўлса, "Аякс" "Боруссия Д"ни йирик 4:0 ҳисобида мағлуб этди. Шу тариқа мазкур гуруҳда "Аякс" 9 очко билан етакчилик қилмоқда. "Боруссия Д" 6 очко билан иккинчи, "Спортинг" 3 очко билан учинчи поғонадан жой олган. "Бешиктош" ҳозирча умуаман очко жамғара олмаган.

 

Бугун Европа чемпионлар лигасининг қолган учрашувлари бўлиб ўтади.

 

 

Жамшидбек Амиров