"Uzbekistan Airports" хорижий авиакомпаниялар учун тарифларни пасайтирди
"Uzbekistan Airports" AJ раҳбарияти хорижий авиакомпаниялар томонидан амалга ошириладиган мунтазам қатновларга ер усти хизмат кўрсатиш тарифлари ва йиғимларининг янги рўйхатини тасдиқлади.
Хусусан, қуйидаги хизматлар учун тарифлар ва тўловлар пасайтирилди:
- самолётларнинг учиши ва қўнишини таъминлаш;
- йўловчиларнинг авиация хавфсизлигини таъминлаш;
- самолётларнинг авиация хавфсизлигини таъминлаш;
- аэропорт терминалидан фойдаланиш;
- келган йўловчиларга хизмат кўрсатиш;
- кетиш учун йўловчиларга хизмат кўрсатиш;
- «CUTE» платформасига киришни таъминлаш.
Тарифлар ва тўловларни пасайтириш Ўзбекистон аэропортларининг рақобатбардошлигини оширади ва хорижий авиаташувчиларни кўпроқ жалб қилади.
Ўртача тарифларнинг пасайиши 15 фоизга тенг бўлиб, нархлар ва тўловларнинг янгиланган рўйхати 31 октябрдан IATA 2021/2022 қиш мавсумининг бошидан бошлаб киритилади.
Бундан аввал «Uzbekistan Airways» янги модель асосида Тошкентдан Москвага илк парвозни амалга оширгани, Будапештдан Ўзбекистон шаҳарларига парвозлар йўлга қўйилиши режалаштириаётгани ҳамда Тошкент — Қарши — Тошкент авиақатнови қайта тиклангани ҳақида хабар берилган эди.
Муножат Валиева
