Узлуксиз таълим тизимида бир нечта чет тилини ўрганиш концепсияси тасдиқланди

 

Унга кўра, айрим фанлар чуқурлаштириб ўқитиладиган ихтисослаштирилган мактабларда 5-синфдан бошлаб икки ва ундан ортиқ чет тилларини ўқитиш йўлга қўйилади. Бунда ўргатиш ўқув режадаги баъзи фанларни хорижий тилларга ўтказиш ҳисобига амалга оширилади. Шунингдек, мактаб-интернат ва ижод мактабларида ҳам бу тизим тадбиқ қилинади. Бунда мазкур тизим 7-синфдан бошланади.

 

Узлуксиз таълим тизимида чет тилларини ўрганишни тизимли тарзда бир нечта босқичга бўлган ҳолда амалга ошириш кўзда тутилган.

 

Жумладан:

 

- мактабгача таълим ташкилотлари, умумтаълим мактаблари, бошланғич профессионал таълим муассасалари ва академик лицейларда;

 

- айрим фанлар (хорижий тиллар) чуқурлаштириб ўқитиладиган ихтисослаштирилган мактабларда 5- дан 11-синфгача, айрим фанлар (хорижий тиллар) чуқурлаштириб ўқитиладиган мактаб-интернат ва ижод мактабларида эса 7- дан 11-синфгача бўлган даврда; қўшимча тарзда, академик лицейларнинг хорижий тил чуқурлаштириб ўқитиладиган таълим йўналишларида;

 

- олий таълим муассасаларининг 1-2-курсларида касбий вазиятларда қўллашни ўрганиш босқичига кўтарилади. Бунда чет тилини ўрганиш аввалги босқичда ўқиган чет тилларини давом эттирган ҳолда олиб борилади.

 

Концепциянинг асосий мақсади:

 

- таълим олувчиларнинг лингвистик барқарор ва узлуксиз ривожланиши учун қулай шарт-шароитларни яратиш;

 

- таълим олувчиларнинг исталган даражада чет тилида мулоқот қилиш қобилиятини шакллантириш. Уларга бошқа маданият ва урф-одат вакиллари билан тенг ҳуқуқли мулоқот қилиш имкониятини бериш;

 

- таълим олувчиларни турли соҳаларда ва маданиятлараро эркин мулоқотга киришишига имкон яратишдан иборат.

 

Бундан аввал чет тилларни ўқитиш бўйича яхши натижаларга эришган мактаблар рағбатлантирилиши ҳамда Президент мактаби битирувчилари давлат ОТМларига имтиҳонсиз грант асосида қабул қилиниши ҳақида хабар қилинганди.

 

 

Оламгир Абдиев