Россияда коронавирус авж олганига нима сабаб бўлгани очиқланди
Россия Федерациясида 26 октябрь ҳолатига кўра, бир кеча-кундузда 36 минг 446 кишида COVID-19 вируси аниқланган ва улардан 1 минг 106 нафари ҳаётдан кўз юмган.
Ҳозирги кунда коронавируснинг янги штаммлари дунё бўйича тарқалиб, инсонлар ҳаётига юқори даражада хавф солмоқда.
Россия Федерациясида 26 октябрь ҳолатига кўра, бир кеча-кундузда 36 минг 446 кишида COVID-19 вируси аниқланган ва улардан 1 минг 106 нафари ҳаётдан кўз юмган. Мутахассислар айни пайтда вазиятнинг бу қадар аянчли тус олишига сабаб бўлган омилларни таҳлил қиляпти.
Россиядаги етакчи илмий-тадқиқот институтларидан бирининг лаборатория раҳбари, тиббиёт фанлари доктори, профессор Михаил Костиновнинг маълум қилишича, буларнинг ҳаммаси мамлакатда коронавирусга қарши жамоавий иммунитет шаклланмагани билан боғлиқ. Чунки аҳолини эмлаш даражаси паст.
Унинг сўзларига кўра, Россияда COVID-19 га қарши 3 та вакцина қўлланиляпти. Бироқ аҳоли орасида эмланишни хоҳламаётган ёки уни пайсалга солаётганлар кўп. Оқибатда улар вақт ўтиб барибир ушбу касалликка чалинмоқда. Шу туфайли вируснинг янги мутациялари пайдо бўлишига имконият юзага келмоқда.
Мутахассислар фақат оммавий иммунитет COVID-19 ни тўлиқ блоклаш имконини беради, - дейишмоқда
Эслатиб ўтамиз, бундан аввал ЖССТ пандемия 2022 йил давомида ҳам чўзилиши мумкинлигидан огоҳлантиргани ва исроиллик олимлар коронавируснинг АY.4.2 деб номланган янги турини қайд этгани ҳақида хабар берилганди.
Чўлпоной Аҳмедова
