Ёшларимиз саралашни дуранг билан бошлади
Ўйин "Пахтакор" марказий стадионида бўлиб ўтди.
Бугун «Пахтакор» марказий стадионида U-23 Осиё Кубоги саралашидан ўрин олган баҳсларга старт берилди. Мазкур баҳсларнинг дастлабки учрашуви Ўзбекистон ва Саудия Арабистони терма жамоалари иштирокида бўлиб ўтди. Муросасиз кечган тўқнашув дуранг натижа билан якунланди.
Ўйиннинг 40-дақиқасида Ҳамид Абдуллоҳ арабларни ҳисобда олдинга олиб чиққан бўлса, бироз вақт ўтиб термамиз сафида Отабек Жўрақўзиев ҳисобни тенглаштиришга муваффақ бўлди. Шу тариқа жамоалар танаффусга дуранг натижа билан йўл олди. Иккинчи таймнинг дастлабки дақиқасида эса саудияликлар биринчи ҳужумдаёқ термамиз дарвозасига тўп киритди ва ҳисобда яна олдинга чиқиб олди. Учрашувнинг 79-дақиқасига келиб жамоамиз сардори Жасур Жалолиддинов пенальтидан унумли фойдаланиб ҳисобни тенглаштирди.
Эслатиб ўтамиз, мазкур саралаш ўйинларининг иккинчи баҳси Бангладеш ва Қувайт термалари иштирокида бўлиб ўтади.
Жамшид Амиров
