ПЦР-тест, сертификат ва тиббий маълумотнома. Туркияга кириш тартиби ўзгартирилди
Янги тартиб 2 ҳафта аввал кучга кирган, аммо “Uzbekistan Airways” бу ҳақда бугун маълум қилди.
Туркия мамлакатга кириб келаётганлар учун янги тартиб жорий этди. Бу ҳақда “Uzbekistan Airways” хабар берди.
Эндиликда Туркияга кириб келган 12 ёшгача бўлган болалар ПЦР-тест топшириши шарт эмас. Авваллари бу каби тартиб 6 ёшгача бўлган болаларга жорий қилинган эди.
Бундан ташқари эмлаш сертификатига эга бўлмаганлар мажбурий 14 кунлик изоляцияга олинади. Қолган қоидалар ўзгаришсиз қолган: Туркияга кириш учун тўлиқ эмланганлик ҳақида сертификат ёки сўнгги 6 ойда коронавирусдан соғайганлик тўғрисида тиббий маълумотнома талаб этилади.
Агарда бу каби ҳужжатлар бўлмаса, кириб келаётганлар ПЦР-тест топшириши керак. “Спутник Узбекистан”нинг қайд этишича, ушбу қоидалар икки ҳафта олдин кучга кирган, аммо “Uzbekistan Airways” бу ҳақда бугун маълумот берди.
Бундан аввал Ҳиндистон Ўзбекистон фуқароларига виза беришни тиклагани хабар қилинганди.
