Аёл таҳқирланди! Тошкентда солиқчи хотинини ерга ётқизиб, дўппослади

 

Маълум қилинишича, аёлни уриш анча олдин бошланган, навбатдаги мушт кўтаришдан кейин аёл эрини ташлаб кетган. Бу ҳақда "Nemolchi.uz" хабар берди.

 

Айтилишича, улар жорий йилнинг апрель ойида улар 14 ёшли ўғлидан айрилган. Ҳодисадан уч ҳафта ўтгач, аёл эрининг ёш қиз билан никоҳ ўқитгани ва уни уйига олиб келганидан хабар топган. Шундай бўлса-да, эркак  хотинининг қайтиб келишини айтаверган.

 

У турмуш ўртоғидан янги оиласи билан яшаб, уни тинч қўйишини сўраган. Аммо солиқ ходими аёлнинг ишхонасига, болалари билан яшаётган отасининг уйига келган. Сўнгра аёл отасининг танишидан ижарага квартира олиб, автотураргоҳи бор ёпиқ ҳудудга кўчиб ўтган.

 

Қайд этилишича, июнь ойи охирида аёл одатдагидек машинани тўхташ жойига олиб келганида, унинг эри “Кимни олдига келдинг?”, деган савол билан уни тақиб этган. Аёл эркакка қаердалигини суриштириш унинг иши эмаслигини айтганидан сўнг, эркак уни ура бошлаган: ерга ётқизиб, юзига бир неча бор тепган. Кейин эса ҳеч нима бўлмагандек, Калтаклашни тугатгандан кейин сўнг, аёлини касалхонага олиб борган. Шифокорларга хотинини бегона эркак билан ушлаб олгани учун урганини айтган.

 

Жабрланувчининг қизи онаси ҳали ҳам уйда йўқлигидан хавотирланиб, ер ости автотураргоҳига тушади. Бу ерда онасининг атрофи қонга ботган, эшиги очиқ машинасини кўриб, ИИБ (102)га қўнғироқ қилган.  Воқеа жойига етиб келган тезкор ходимлар камералардан аёлнинг ёлғиз қолгани, эркак эса уни зўравонлик билан калтаклагани акс этган тасвирларни олган.

 

Ҳолат юзасидан Жиноят Кодексининг 104-модда (Баданга қасддан оғир шикаст етказиш) бўйича иш қўзғатилган. Эркакка нисбатан уч йилдан беш йилгача озодликдан маҳрум қилиш ёки уч йилдан беш йилгача озодликдан чеклаш жазоси тайинланиши кутилмоқда.

 

Таъкидланишича, айбланувчи буларнинг барчасидан кейин аёлни ўзига қайтаришга уриниб, таъқиб қилишда давом этган.

 

“У ортимдан қолмаяпти. Ажрашишга имкон бермаяпти. Жуда ҳам чарчадим. Терговчига қўнғироқ қилиб, у мени таъқиб қилаётгани, бирор чора кўришини сўрадим”, — деган жабрланувчи. Шунингдек, у эри ҳозирча уни таъқиб қилишдан тинчигани, лекин бу ҳол яна такрорланиши мумкинлигини қайд этган.

 

Бундан бир неча кун аввал Низомий номидаги Тошкент давлат педагогика институти “замдекан”и талаба қизга тегажоғлик қилгани ҳақида хабар тарқалганди. Ушбу ҳодисага Cаида Мирзиёева ва Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси Комил Алламжонов  ҳам ўз фикрларини билдирганди.

 

Эслатиб ўтамиз, аввалроқ йўл четида эри томонидан хўрланган аёл  ҳақида видеолавҳа ҳамда кекса онасини таҳқирлаган аёл юзасидан маълумот берилганди.

 

Баҳринисо Мадумарова