Тошкент аэропортида 200 га яқин йўловчи Истанбулга уча олмади
“Uzbekistan Airports” компанияси ижтимоий тармоқларда тарқалган Тошкент аэропортида одамлар тўплангани акс этган видео юзасидан изоҳ берди.
Компания хабарига кўра, кеча 3 ноябрь куни “Uzbekistan Airways” рейси билан Тошкент — Истанбул йўналиши бўйича учмоқчи бўлган 200 га яқин киши аэропортга келган. Бироқ бу рейс жадвалда бўлмаган. Йўловчилар чипталарни “Asia Luxe Travel” сайёҳлик компанияси орқали сотиб олишганини айтишган.
“Uzbekistan Airways” вакиллари сайёҳлик компанияси авиачипталар савдосини авиакомпания билан слотни (аэропортдаги парвоз учун ажратилган вақт) келишмаган ҳолда ташкил қилганини маълум қилган.
Сайёҳлик компанияси йўловчиларга сув тарқатган ва уларни меҳмонхонага жўнатиш учун транспорт ташкил қилган. Таъкидланишича, одамлар терминал биносини тарк этишдан бош тортишган.
Таъкидлашича, Ўзбекистон Транспорт вазирлиги ташаббуси билан захира ҳаво кемаси ажратилиб, барча йўловчилар рўйхатга олинган. Самолёт кечанинг ўзидаёқ маҳаллий вақт билан соат 20:30 да Истанбулга учиб кетган.
Аввалроқ Исломободдан Лондонга учаётган самолёт йўловчи аёлнинг ўлими туфайли Тошкентга фавқулодда қўнгани ҳамда у ўз йўловчиларини олиб кетгани ҳақида хабар берилганди.
Баҳринисо Мадумарова
