“Мейжи инқилоби” — "Япон мўъжизаси"
JICA президенти Шиничи Китаока ўзбекистонлик талабаларга онлайн-маъруза ўқиди.
Япония иқтисодий жиҳатдан Осиёнинг етакчи давлатларидан бири ҳисобланади. Ҳозирги кунда ушбу кунчиқар мамлакатнинг бой тарихи ва ўзига хос маданияти барчани бирдек қизиқтиради. Уларнинг яқин тарихига назар ташлайдиган бўлсак, XIX асрда рўй берган "Мейжи инқилоби" туфайли модернизация даври, Иккинчи жаҳон урушидан сўнг қайта тикланиш ҳаракатлари муваффақиятли кечганлигига гувоҳ бўламиз. Бу тарихда "япон мўъжизаси" номини олган.
Ўзбекистонлик талабалар ва ўқитувчилар учун “JICA Chair” лойиҳасини амалга ошириш доирасида ташкилот президенти Шиничи Китаока томонидан “Мейжи инқилоби: Кенг кўламли модернизациянинг бошланиши” мавзусида онлайн-маъруза ўтказилди. Бу ҳақда “Дунё” АА хабар берди.
Шиничи Китаока тингловчиларга Ўзбекистон ва Япония ўртасидаги икки томонлама ҳамкорликнинг ҳозирги ҳолати, видео орқали олдиндан ўзлаштирилган "Мейжи инқилоби" бўйича ўзининг фикр-мулоҳазалари ҳамда қарашлари билан бўлишди.
Таъкидланишича, иштирокчилар Япониянинг ижтимоий-иқтисодий, сиёсий ва маданий соҳаларидаги ривожланиш тарихининг ўзига хос хусусиятлари, жумладан, мамлакатда давлатчиликнинг ташкил этилиши, дастлабки ривожланиш даврида иқтисодиётда қишлоқ хўжалигининг ўрни, илм-фан ва таълимнинг мамлакат ривожига қўшган ҳиссасига оид маълумотларни билиб олишди.
Маълумот учун: 1867—68 йилларда Японияда деҳқонлар, шаҳар камбағаллари, савдо-саноат корчалонлари, дворянларнинг қуйи табақалари, сарой аслзодалари ва мухолифатдаги баъзи йирик зодагонлардан иборат кенг омма сёгунларга қарши чиқади. Натижада буржуа инқилоби — "Мейжи инқилоби" содир бўлди. Сёгун ҳукумати ағдарилди ва ҳокимият император Муцухито (1867—1912 йларда ҳукмронлик қилган) қўлига ўтган. Шу даврдан бошлаб Япония император ва унинг ҳукумати бошчилигида туб ижтимоий-сиёсий ва иқтисодий ислоҳотлар йўлига ўтиб, тезлашган модернизация орқали ғарб давлатлари даражасига етишни ўз олдига мақсад қилиб қўйди.
Эслатиб ўтамиз, аввалроқ аввалроқ Тошкент давлат иқтисодиёт ва Индонезия таълим университети ўртасида қўшма таълим дастурини ташкил этиш бўйича шартнома имзолангани хабар қилинган эди.
