Рўзиқул Бердиев: “Бор эътиборимизни олдимизда турган ҳал қилувчи баҳсга қаратамиз”
Қарши шаҳрининг “Насаф” клуби бош мураббийи Рўзиқул Бердиев ОФК Кубоги финали олдидан ташкил этилган матбуот анжуманида жамоанинг ўйинга тайёргарлиги ҳақида гапирди:
“Бизни финал кутяпти. Иккала жамоа ҳам бунга осонликча етиб келгани йўқ. Шу боис ҳар икки жамоа ҳам майдонда бор имкониятини ишга солишга ҳаракат қилади.
Рақиб жамоани обдон ўргандик. Шаклланган жамоа. Таркибида маҳоратли футболчилари кўп. Анча тартибли ўйнайди. Йигитларимизга рақиб тўғрисида тўлиқ маълумот беришга ҳаракат қилдик. Иссиқ об-ҳаво бироз қийинчилик туғдириши мумкин, лекин бу баҳона бўла олмайди. Биз ҳар қандай қийинчиликка чидашимиз, яхши ўйин кўрсатиб финал учрашувида, албатта, ғалаба қозонишимиз керак.
Тўғри, мусобақа тўпурари, ассистлар етакчилари, кўп гол урганлар бўйича рақам ва статистика бизнинг тарафда. Лекин уларнинг барини унутиб, бор эътиборимизни олдимизда турган ҳал қилувчи баҳсга қаратамиз”.
Эслатиб ўтамиз, “Насаф” – “Ал Муҳаррақ” ўртасидаги финал ўйини бугун Тошкент вақти билан 21:00да бўлиб ўтади.
Аввалроқ “Насаф” ОФК Кубоги финалига йўл олгани ҳақида хабар берилганди.
Жамшидбек Амиров
