Менинг асосий мақсадим ҳимоя чизиғидаги муаммоларни оз бўлсада бартараф этиш – Сречко Катанец

 

Бугун пойтахтимиздаги “Пахтакор” стадионида терма жамоамиз ушбу ўйин олдидан дастлабки машғулотларни ўтказди. Жамоамиз бош мураббийи Сречко Катанец мазкур ўйин олдидан ўзининг фикрлари билан ўртоқлашди:

 

Дастлаб ўртоқлик учрашувига жалб этилган футболчилар ҳақида тўхталиб ўтсангиз?

 

Биз таркибни доимо Ўзбекистон футбол ассоциацияси билан ҳамкорликда танлаймиз. Греция термаси жамоамиз учун яхши рақиб ҳисобланади. Иккинчи томондан бу бизга яхшигина синов ҳам бўлади. Бизда Грецияга қарши ўйинга тайёргарлик кўриш учун етарлича вақт бор. Таркиб ҳақида гапирадиган бўлсак, ҳозирда марказий ҳимояда муаммоларимиз мавжуд. Хусусан, бу галги йиғинда Рустам Ашурматов ҳамда Шаҳбоз Умаров айрим сабабларга кўра иштирок этишмаяпти. Менинг асосий мақсадим ҳимоя чизиғидаги муаммоларни оз бўлсада бартараф этиш.

 

Сиз шу вақтга қадар бир нечта футболчиларнинг ўйинини кузатишга эришдингиз. Ўзингиз учун янги бўлган номларни кашф этдингизми ва қайси футболчиларни алоҳида эътироф этган бўлардингиз?

 

Деярли барча ўйинчиларни гапиришимиз мумкин. Мен терма мураббийлигига келгунга қадар фақат Элдор Шомуродов ёки Жалолиддин Машарипов каби футболчиларни билардим. Ҳозирда бошқа ўйинчиларни ҳам кашф этяпман. Кўпроқ ёшларга имконият яратишга ҳаракат қиляпман. Улар хато қилган тақдирда ҳам доим қўллаб-қувватлаймиз. Чунки, айнан улар орқали терма жамоа ўйинида қандайдир янгиликлар яратиш мумкин.

 

Бугунги кунда термамизнинг ҳужум чизиғида рақобат кучайиб бормоқда. Мана шу ҳужумчиларимизнинг сермаҳсуллиги сизда қандай таассурот қолдирмоқда?

 

Тўғри ҳозирда ҳужум чизиғимиз нисбатан яхши ҳолатда деб айтиб ўтишимиз мумкин. Лекин, алоҳида у ўйинчиларга таянган ҳолда эмас, бутун жамоани шакллантиришимиз керак.

 

 

Жамшидбек Амиров