Шавкат Мирзиёевнинг қайта сайланиши Ҳиндистон-Ўзбекистон алоқаларининг янада мустаҳкамланишига замин яратади — “India Narrative”
Ўзбекистонни Ҳиндистоннинг Марказий Осиёдаги энг муҳим ҳамкорига айлантиради.
Ҳиндистондаги етакчи сиёсий-таҳлилий сайтлардан бири бўлган “India Narrative” веб-саҳифасида “Нарендра Модининг яқин ҳамкори Шавкат Мирзиёевнинг Ўзбекистон Президенти лавозимига қайта сайланиши Ҳиндистон ва Марказий Осиё давлатлари ўртасидаги алоқалар кўламининг янада кенгайиши учун замин яратади” сарлавҳали мақола эълон қилинди. Бу ҳақда “Дунё” АА хабар берди.
Қайд этилишича, “International Affairs Review” онлайн-нашри бош муҳаррири, сиёсий таҳлилчи Адити Бхадури томонидан тайёрланган мақола жорий йил 24 октябрь куни мамлакатимизда бўлиб ўтган Ўзбекистон Президенти сайлови якунларига бағишланган.
“Яқинда Ўзбекистонда бўлиб ўтган Президент сайлови натижаларига кўра, Шавкат Мирзиёевнинг Президент лавозимига қайта сайлангани Ўзбекистоннинг келгуси тараққиёти ва Ҳиндистон билан ўзаро муносабатлар ривожи учун муҳим аҳамият эга”, — деб ёзади муаллиф.
Шунингдек, мақолада Ўзбекистон дунёнинг энг яхши сайёҳлик йўналишларидан бирига айланганига эътибор қаратилган. Юртимизда қўшимча иш ўринлари яратилгани, ҳозирги кунга келиб эса Ўзбекистоннинг ялпи ички маҳсулоти ҳажми 60 миллиард долларга етгани ҳақида сўз боради.
Терроризм ва диний радикализм каби хуружларга чек қўйилди. Жамиятда дин ва эътиқод эркинлиги тўлиқ таъминланди.
Муаллифнинг фикрича, юқорида қайд этилган барча соҳалардаги ютуқлар мамлакат тараққиётида муҳим ўрин тутиш билан бирга, ўз навбатида, Ўзбекистонни Ҳиндистоннинг Марказий Осиёдаги энг муҳим ҳамкорига айлантиради. Шавкат Мирзиёевнинг қайта сайланиши ҳинд-ўзбек икки томонлама муносабатларини янада мустаҳкамланишига хизмат қилади.
“Президент Шавкат Мирзиёевнинг қайта сайланиши Ўзбекистондаги жадал ислоҳотлар жараёнини давом этишини англатиш билан биргаликда, ўз навбатида, Ҳиндистон-Ўзбекистон алоқаларининг янада мустаҳкамланишига замин яратади”, — дея хулоса қилган сиёсий таҳлилчи Адити Бхадури.
Эслатиб ўтамиз, Оманда нашр этиладиган "Asdaa Oman" газетаси бош муҳаррири Али ал-Ҳасаний Ўзбекистон Президенти этиб сайланган Шавкат Мирзиёевнинг лавозимга киришишига бағишланган тантанали маросим ҳақидаги фикрлари билан ўртоқлашганди.
Аввалроқ Ўзбекистон-Филиппин муносабатларининг ҳозирги ҳолати ва ривожланиш истиқболлари муҳокама қилингани, Ўзбекистон ва Туркманистон ўртасидаги савдо-иқтисодий алоқалар бутунлай янги босқичга кўтарилгани ҳамда "The Korea Times" газетаси Ўзбекистонда амалга оширилаётган туб ислоҳотлар бўйича мақола чоп этилгани ҳақида хабар берилганди.
