Янги спорт ассоциацияси ташкил этилди
У 2024-йилда Парижда бўлиб ўтадиган ёзги Олимпия ўйинлари дастурига киритилган.
Тошкентда “Скейт Ўзбекистон” ассоциациясини таъсис этиш бўйича Конференция бўлиб ўтди. Бу ҳақда Туризм ва спорт вазирлиги ахборот хизмати хабар берди. Унда “Скейт Ўзбекистон” ассоциацияси номи билан янги спорт ташкилотини тузиш масаласи кўриб чиқилди.
Aссоциацияси раиси этиб, Азиз Аҳмедов сайланди.
Бугунги кунда жаҳоннинг “Ворлд Скате” ассоциацияси билан ҳамкорлик ишлари йўлга қўйилган бўлиб, ушбу спорт турини Ўзбекистонда ривожлантириш ҳамда спортчиларимизни нуфузли халқаро мусобақаларга тайёргарлик кўриши ва иштирок этиши учун музокаралар олиб борилмоқда.
“Скейт Ўзбекистон” ассоциацияси қуйидаги спорт турларини ўз ичига олади:
— Скейтбординг,
— Роллерда конькида учиш,
— Роллерда фигурали учиш,
— Роллерда юқори тезлик,
— Роликли конькида эркин услуб, шунингдек, эркин слалом,
— Роллерда хоккей,
— Роллер дерби,
— Скутер, шунингдек, эркин скутер.
Юқорида кўрсатилган спорт турлари жаҳоннинг “Ворлд Скате” ассоциацияси таркибига киритилган бўлиб, бугунги кунда 160 дан ортиқ давлатда федерация ва ассоциациялар фаолият олиб бормоқда.
2021 йилда скейтбордингнинг икки йўналиш бўйича Токио-2020 ёзги Олимпия ўйинлари мусобақалари ўтказилди.
Маълумот учун: ўзбекистонлик скейтбордчилар учун Париж-2024 олимпиадасига 12 та лицензия олиш имконияти мавжуд.
Аввалроқ ҳудудларда бадминтон, стритбол ва “Workоut” спорт турлари учун спорт майдончалари ташкил этилиши
ҳамда Ўзбекистонда янги спорт ташкилоти – Функционал кўпкураш федерацияси ташкил этилгани ҳақида хабар берилганди.
Муножат Валиева
