Қашқадарёда тўрт хотинли эркак икки хотинининг қотилига айланди
У иккинчи хотинини 2019 йил ўлдириб, қудуққа ташлаб юборган.
Биринчи қотиллигидан сўнг 13 йил “ўтириб чиққан” эркакнинг иккинчи қотиллиги ҳақида унинг 15 ёшли қизи хабар берган.
Мазкур қотиллик воқеаси ҳақида қисқача ахборот берган вилоят ИИБ ахборот хизмати косонлик эркак иккинчи хотинини 2019 йил ўлдириб, қудуққа ташлаб юборганини ошкор қилди.
“Косон туманида яшовчи Т.Қ. маст ҳолда таёқ билан хотини X.Г.ни уриб, қўл ва оёқларини синдириб, қасддан ўлдиради ва жасадни қудуққа ташлаб, тупроқ билан кўмиб юборганлиги аниқланди”, — дейилади вилоят ИИБ ахборот хизмати хабарида.
Аниқланишича, фуқаро дастлабки қотиллигини 1986-йил содир этган. У умрининг 13 йилини панжара ортига ўтказган. Аммо фуқаро бундан тўғри хулоса чиқармай, 2019-йил яна бир хотинини 13 ёшли қизининг кўз ўнгида уриб ўлдириб, қудуққа ташлаган ва устидан кўмиб юборган. Икки йилдан сўнг яъни 2021-йил 15 ёшга кирган ўша қиз ўгай онасини ҳам ўлгудек дўппослайверган отаси яна бир қотилликка қўл уришидан қўрқиб, бу ҳақда ҳуқуқни муҳофаза қилувчи орган вакилларига хабар берган.
