Ноябрь ойи охирида Кореяга кетиш тикланиши мумкин

 

 

Корея Республикаси Бандлик ва меҳнат вазирлиги расмий баёнотига кўра, жорий йилнинг ноябрь ойи охирида ишчи кучи жўнатувчи барча давлатлар қатори Ўзбекистондан ҳам меҳнат мигрантларини қабул қилиш тартиби тикланиши режалаштирилган. Бу ҳақида Ташқи меҳнат миграсияси агентлиги матбуот хизмати раҳбари Ортиқхўжа Норов УзАга берган интервюсида маълум қилди.

 

Расмийнинг айтишича, эндиликда Кореяга кетишни истаганлар имтиҳон жараёнларининг барча босқичларидан ўтган бўлиши лозим. Шунингдек, уларга иш берувчи томонидан меҳнат шартномаси берилган бўлиши лозим.

 

Мазкур хориж давлатига ишлаш учун жўнаб кетишни кутаётган фуқаролар Кореяда тан олинган, яъни AstraZeneca, Moderna, Pfizer ваксиналардан бири билан эмланган бўлиши лозим. Бунда мигрантдан Корея Республикасига кириб боришдан камида 14 кун олдин тўлиқ эмланган бўлиши ва тегишли сертификатни тақдим этиши талаб этилади.

 

Бундан ташқари, меҳнат мигранти жўнаб кетишдан бир ҳафта, шунингек, учиш вақтидан 72 соат олдинроқ Корея Республикасининг Ўзбекистон Республикасидаги элчихонаси томонидан тан олинган лабараторияларида ПЦР тестларини топширган ва тест натижасидан манфий жавоб олган бўлиши лозим.

 

Эслатма. Бунда Korea No 1 Laboratory, SWISS LAB, De Factum Laboratories, INTERMED Innovation лабораториялари назарда тутилмоқда.

 

“Эндиликда Корея Республикасига кириб борган меҳнат мигрантлари аввалгидек 14 кун эмас, балки 10 кунлик карантин даврини ўташи ҳам лозим бўлади”, - дейди агентлик матбуот хизмати вакили.

 

Эслатма. 2020 йилнинг март ойида бошланган коронавирус пандемияси оқибатида жорий этилган қатор чекловлар сабабли Корея Республикаси меҳнат мигрантларини қабул қилишни тўхтатган эди.

 

Россияда миграция тўғрисидаги янги қонун ишлаб чиқилаётгани, меҳнат миграциясига кетаётган фуқароларга компенсация тўланиши ҳамда “Е-8” визаси асосида 420 нафар фуқаро Кореяга ишга юборилгани ҳақида хабар берилганди.

 

Оламгир Абдиев