"Президент кубоги" халқаро турнири қизғин тус олмоқда
Ушбу мусобақада дунёнинг 9 та давлатидан жами 104 нафар моҳир шахматчилар дона сурмоқда.
11 ноябрь куни пойтахтимизда шахмат бўйича Ўзбекистон Республикаси Президенти соврини учун халқаро турнирга старт берилганди.
"Президент кубоги" халқаро турнирида 27 нафар гроссмейстер, 16 нафар халқаро мастер, кўплаб FIDE устаси ҳамда спорт усталари иштирок этишмоқда.
6-тур ўйинларидан кейин мусобақада 4 нафар пешқадам ажралиб чиқди. Эътиборли жиҳати, улардан икки нафари ҳамюртларимиздир.
Жумладан, ҳамюртимиз Шамсиддин Воҳидов оқ доналарда украиналик Александр Моисенко устидан ғалабага эришди ва ўз очколари сонини 5 тага етказиб, пешқадамлар сафидан жой олди. Нодирбек Ёқуббоев эса қора доналарда бошқа бир украин шахматчиси Виталий Сивукни мағлуб этди ва у ҳам 5 очко билан пешқадамлар квартетига қўшилди.
Россиялик халқаро гроссмейстер Санан Сюгиров эса 6-турда АҚШ шарафини ҳимоя қилаётган шахматчи Тимур Гареевни доғда қолдириб, қўшимча коэффициентларга кўра пешқадамликни ўз қўлига олди. Шунингдек, украиналик Виталий Бернадский ҳам 6-турда америкалик Ханс Ниеманн устидан ғалабага қозониб, ўз очколари сонини 5 тага етказиб олди.
Ҳамюртимиз, халқаро гроссмейстер Жавоҳир Синдаров россиялик Максим Матлаков билан дурангга эришган бўлса, ҳамюртларимиз орасида энг юқори рейтингга эга шахматчи Нодирбек Абдусатторов FIDE устаси, ҳамюртимиз Муҳиддин Мадаминовни доғда қолдирди. Ушбу натижалардан кейин Синдаров ва Абдусатторовлар ҳисобидаги очколар сони 4,5 тага етди ва улар пешқадамларни таъқиб этишмоқда.
Эслатиб ўтамиз, "Президент кубоги" халқаро турнирининг умумий соврин жамғармаси 120 000 АҚШ долларини ташкил этади ва бу мамлакатимиз шахмати тарихида энг юқори соврин жамғармасига эга турнир сифатида тарихга кирди.
Аввалроқ Тошкентда соврин жамғармаси 120 минг долларлик турнир ўтказилиши ҳақида хабар берилганди.
Жамшидбек Амиров
