Халқаро қишлоқ хўжалиги университети ташкил этилади

 

Бу ҳақда Вазирлик матбуот хизмати хабар берди.

Хабарда айтилишича, Ўзбекистон аграр идораси вакилларининг ташрифидан кўзланган мақсад Ўзбекистонда Халқаро қишлоқ хўжалиги университетини ташкил этиш юзасидан ўзаро ҳамкорликни мустаҳкамлаш, ўқув дастурларини ишлаб чиқиш ва бошқа масалаларни муҳокама қилишдан иборат.

 

Учрашувда Тошкент давлат аграр университети ректори маслаҳатчиси профессор Мунира Аминова  Ўзбекистон Қишлоқ хўжалиги вазирлиги мутахассислари билан биргаликда "RAU" раҳбарияти, жумладан, проректор ўринбосари профессор Нил Равенскрофт, "RAU2 Қишлоқ хўжалиги мактаби раҳбари Филип Хадсон ва "RAU" тадқиқот директори профессор Марк Хортон билан учрашди.

 

Буюк Британиялик профессор Равенскрофт мазкур учрашув доирасида ўз фикрларини билдирди:

 

“Биз Ўзбекистон жамоасини Сайренсестерда кутиб олишдан мамнунмиз. Бу йил бўлиб ўтган муҳокамалар натижаларига кўра, улар Ўзбекистонда янги Халқаро қишлоқ хўжалиги университетини ташкил этиш бўйича ҳамкорлик талабларига жавоб бера олишимизга ишонч ҳосил қилиш мақсадида университетимизга ташриф буюришди. RAU'нинг тарихига назар ташласак, у барча даврларда бутун дунё бўйлаб қишлоқ хўжалиги мутахассислари билан ҳамкорлик қилишга интилиб, билимлар халқаро форматда бўлсада, долзарб бўлиб қолишига ва маҳаллий даражада қўлланилишига, талабаларнинг жаҳон даражасида таълим олишларини таъминлашга ҳаракат қилди”.

 

Унинг таъкидлашича, “RAU”нинг Ўзбекистон Қишлоқ хўжалиги вазирлиги билан мустаҳкамланиб бораётган алоқалари ушбу анъанавий ёндашувни давом эттириб, янги Халқаро қишлоқ хўжалиги университети талабалари ушбу ҳамкорликдан энг яхши натижаларга эришишларини таъминлайди.

 

Ушбу ҳамкорлик режаси давомида Ўзбекистон Қишлоқ хўжалиги вазирлиги жамоаси университетнинг талабалари, ўқитувчилари ва бошқа ходимлари билан учрашишди, талабалар шаҳарчаси ва университет хўжалигининг Фарм-491 агротехнологик инкубаторида бўлиб, инфратузилма билан танишишди. Шунингдек, делегацияга янги виртуал ўқув муҳити (Virtual Learning Environment) ва “RAU” талабаларининг ҳамкор университетлар, яъни, Хитойда ўқитишда муваффақиятли қўлланилган бошқа инновациялар тақдим этилди.

 

Маълумот учун: жорий йилда Ўзбекистон Қишлоқ хўжалиги вазирлиги, Қироллик қишлоқ хўжалиги университети (RAU ) ва “Litva Vitautas Magnus University” (VDU) ўртасида уч томонлама ўзаро англашув ва ҳамкорлик меморандуми имзоланган. Меморандумда Ўзбекистон Республикаси Қишлоқ хўжалиги вазирлиги, “RAU” ҳамда (VDU) янги халқаро университетни яратиш ва фаолиятини йўлга қўйиш бўйича музокаралар олиб бориш кўзда тутилганди.

 

Шунингдек, меморандумда университетлар ўртасида ўқитувчи ва талабалар алмашинувини йўлга қўйиш ҳамда фермерлар ва фермер хўжаликлари маслаҳатчиларининг малакасини ошириш ва алмашиш дастурларини амалга ошириш, лойиҳа ва дастурлар ишлаб чиқиш, қўшма илмий тадқиқотларни ўтказиш, халқаро конференциялар ва бошқа кўплаб масалалар кўзда тутилган.

 

Эслатиб ўтамиз, аввалроқ  Жиззахда Қозон университети филиали очилиши ҳамда Наманганда Покистоннинг Лаҳор вилояти билан ҳамкорликда лойиҳа қиймати 10 миллион доллар бўлган Lahore халқаро университети филиали ташкил этилгани тўғрисида хабар берилганди.

 

Чўлпоной Аҳмедова