Қорақалпоғистонда ИИВнинг 3 нафар ходими иштирокида ЙТҲ рўй берди
Уларнинг 3 нафари ҳам вафот этган.
Бу ҳақида ЖИЭД матбуот хизмати хабар бермоқда.
Маълум бўлишича, жорий йилнинг 26 ноябрь куни соат 00.10 ларда видеоселектор йиғилишидан қайтаётган ИИВ Жазони ижро этиш департаментининг ходимлари Нукус-Қўнғирот йўлида автоҳалокатга учраган.
Қорақалпоғистон Республикаси Хўжайли тумани ҳудудидан ўтувчи “А-380” “Ғузор-Бухоро-Нукус-Буйнеу” автомобиль йўлининг 708 километрида жазони ижро этиш хизмати ходими И.И хизмат жойидан хонадонига қайтаётган вақтида ўзига тегишли бўлган “Cobalt” автомашинасини бошқараётганда, қарама-қарши томонларни ажратиб турадиган бетон тўсиққа урилиши оқибатида йўл-транспорт ҳодисаси содир бўлган.
Оқибатда, транспорт воситасида бўлган шахслар М.Х ҳамда Х.Х лар оғир тан жароҳати билан воқеа жойида, И.И эса кўрсатилган тиббий ёрдамга қарамасдан Хўжайли туман тиббиёт бирлашмасида вафот этган
Ҳозирда юз берган автоҳалокат юзасидан терговга қадар текширув ишлари олиб борилмоқда.
Эслатиб ўтамиз, аввалроқ Қашқадарё вилояти Қарши шаҳри Янгисарой маҳалла фуқаролар йиғинида яшовчи шахс бошқарувидаги “Сobalt” “ZIL”га урилиши оқибатида ЙТҲ содир бўлгани ҳамда Нукус туманида Matiz автомобили йўлнинг қатнов қисмида кетаётган пиёдани уриб кетгани ҳақида хабар берилганди.
Чўлпоной Аҳмедова
