Россияда ўзбекистонлик мигрантлар ва “Константа” МЧЖ раҳбарияти ўртасида зиддият юзага келди
Ўзбекистондан ишчи гуруҳ Россиянинг Вязьма шаҳрига етиб келди.
Бундан бир неча кун аввал Ижтимоий тармоқ орқали Россия Федерациясининг Смоленск вилояти Вязьма шаҳрида жойлашган “Константа” МЧЖда ишлаётган юртдошларимиз мурожаат билан чиқишган эди. Мурожаатда иш берувчи томонидан уларнинг паспортлари олиб қўйилгани, уч ойдан буён патент расмийлаштирилмаётгани ва ойлик маошлари кечиктирилаётгани маълум қилишган.
Вазиятга ойдинлик киритиш ва аниқланган муаммоларни иш берувчи билан бартараф этиш учун Бандлик ва меҳнат муносабатлари вазирлиги ва Ташқи меҳнат миграцияси агентлиги раҳбариятидан иборат ишчи гуруҳ Вязьма шаҳрига етиб борди.
Ишчи гуруҳ фуқаролар билан учрашиб, уларнинг муаммо ва таклифларини ўрганиш мақсадида мулоқот ўтказди.
Иш берувчи ташкилот раҳбари билан ташкил этилган музокарада фуқаролар томонидан билдирилган эътирозлар, хусусан, паспортларининг олиб қўйилиши, патентларнинг ўз вақтида расмийлаштирилмагани ва маошларининг кечиктирилгани кабиларнинг сабаблари ҳамда уларнинг ечимини топиш масалалари муҳокама қилинди.
“Константа” МЧЖда ишлаётган ўзбекистонлик меҳнат мигрантлари мурожаатини ўрганиш ишлари давом этмоқда.
Аввалроқ, меҳнат мигрантларининг Россияга киришини соддалаштирилиши ҳамда мигрантларга маҳсус чипли пластик карталар тарқатилиши ҳақида хабар берилганди.
Муножат Валиева
