“Бивол - Саламов шоуси”да яна тўртта чемпионлик жанги ўтказилади
11 декабрь куни Россиянинг Екатеринбург шаҳрида “RCC Boxing Promotions” компанияси томонидан профессионал бокс оқшоми бўлиб ўтади.
Ушбу жанг оқшомининг асосий тўқнашуви WBА йўналиши бўйича амалдаги жаҳон чемпиони Дмитрий Бивол ва Умар Саламов ўртасида ўтказилади. Кечанинг марказий жангларидан яна бири WBО рейтингининг иккинчи ва тўртинчи рақамли жангчилари ўзаро тўқнаш келади. Унда Магомед Қурбонов ва Патрик Тейшейра “WBО International” камари учун рингга кўтарилишади.
Мазкур бокс оқшоми доирасида яна учта титул жангги ташкиллаштирилади. Унда Эдуард Скавинский ва Сергей Лобкович WBC йўналишининг ярим ўрта вазн тоифаси чемпионлиги учун баҳс олиб боришади. Россиялик боксчилар Руслан Комилов ва Дмитрий Хасиев “WBО Inter-Continental” камари ва иккинчи енгил вазн тоифасида жаҳон бокс ташкилоти рейтингининг кучли учлигидан жой олиш учун жанг қилишади. Артур Лопсан ва Рамил Ҳажиев эса ўрта вазн тоифасида “WBО Oriental” чемпионлик камари учун тўқнаш келишади.
Аввалроқ Тошкент шаҳрида профессионал бокс оқшоми ўтказилиши ва Геннадий Головкин ва Рета Муратанинг жанг санаси аниқ бўлгани ҳақида хабар берилганди.
Жамшидбек Амиров
