Энди ҳайдовчининг ҳужжати бўлмаса ҳам жавобгарликка тортилмайди. Бироқ…
Транспорт воситасини бошқариш ҳуқуқини берувчи ҳужжатлар ҳайдовчининг ёнида бўлмаганлиги учун жавобгарликка тортиш тартиби бекор қилинмоқда.
Бунда машина бошқарувчисининг ёнида шахсини тасдиқловчи ҳужжати (паспорт, ID-карта) мавжуд бўлса, шунинг ўзи кифоя қилади.
Эслатма. Агар мутлақо ҳужжати бўлмаса, унда жавобгарликка тортилади.
Энг эътиборлиси, эндиликда ҳайдовчиларга транспорт воситасини бошқариш вақтида уяли алоқанинг хавфсиз ва қўлни банд қилмайдиган техник воситаларидан фойдаланишга рухсат берилади. Бундай воситаларга қулоқчин, "bluetooth" киради.
Эслатма. Алоқа воситалари қўлни банд қилмайдиган, бошқарув жараёнига халал бермайдиган бўлиши лозим.
Бундан ташқари, транспорт олд қисмига монитор ўрнатганлик учун жавобгарлик бекор қилинмоқда.
Эслатма. Транспорт воситасини бошқариш жараёнида монитордан теле-, видеодастурларни томоша қилиш таъқиқланади.
МЖтКнинг 4 та моддаси бўйича жазо миқдори ҳуқуқбузарликнинг хавфлилик даражаси ва хорижий тажрибадан келиб чиққан ҳолда мақбуллаштирилмоқда. Жумладан, аҳолининг айрим қатламлари учун моддий-ижтимоий аҳамиятга эга бўлган ҳолат, яъни автомобилда йўловчилар ташиш фаолияти билан лицензиясиз шуғулланганлик учун тўланадиган баъзи жарималар миқдорида ўзгартириш бўлади.
Хусусан, оддий фуқаролар учун олинадиган олдинги жарима тўлови 27 млн. сўм эди. Эндиликда мазкур сумма 1,9 млн. сўмгача пасайтирилади.
Мансабдор шахслар учун эса аввалги 40 млн. сўмдан иборат жарима ундуруви 8,1 млн. сўмгача камайтирилади.
Аввалроқ Тезликни оширганлик учун жарима миқдори камайтирилиши ҳамда ЙТҲ сони ҳам жарима суммаси ҳам ошиб бораётгани ҳақида хабар берилганди.
Оламгир Абдиев
