Бухорода кураш бўйича Ўзбекистон кубоги мусобақалари бошланди

 

Бугун Бухоро Олимпия захиралари коллежида миллий кураш бўйича эркаклар ва аёллар жамоалари ўртасида Ўзбекистон кубогига старт берилди. Бу ҳақда Туризм ва спорт вазирлиги ахборот хизмати раҳбари Лола Раҳмонбоева Zamon.uz'га хабар берди.

 

Мусобақада юртимизнинг барча вилоятлари, Қорақалпоғистон Республикаси ва Тошкент шаҳридан келган 300 га яқин полвонлар ғолиблик учун беллашмоқда.

 

Таъкидланишича, жамоавий беллашувларда ҳар бир жамоа таркибида 9 нафар (5 нафар эркак, 4 нафар аёл) курашчи жой олган. Мусобақада эркаклар -60 кг, -66 кг, -73 кг, -90 кг ва 90 кгдан юқори вазн тоифаларида кураш олиб борса, хотин-қизлар -57 кг, -63 кг, -70 кг ва 70 кгдан юқори вазн тоифаларида гиламга тушишади.

 

Маълумот учун: бу сафар Ўзбекистон кубоги беллашувларида яккалик баҳслари ҳам ташкил этилади.

 

Эслатиб ўтамиз, мусобақанинг очилиш маросимида Бош прокуратура, Бухоро вилояти туризм ва спорт бош бошқармаси ҳамда Ўзбекистон кураш федерацияси мутасаддилари иштирок этишди.

 

Аввалроқ ОТМ талабалари “Туризм ва спорт вазири кубоги” учун беллашгани ҳамда “Баркамол авлод-2021” республика финал босқичининг илк мусобақаси старт олгани ҳақида хабар берилганди.