Олий таълим муассасаларида дарс вақтини қисқартириш таклиф этилди
Талабаларнинг кўпчилиги бу таклифни қўллаб-қувватламоқда.
Yoshlarforumi.uz платформасида олий таълим муассасаларидаги дарс вақтини қисқартириш таклиф қилинди. Муаллифнинг фикрича, дарс соатларини қисқартириш талабаларнинг фойдали иш коеффициентини оширади.
“Олий таълим муассасаларида 1 пара дарс 80 минутга тўғри келади. Маъруза дарсларида ўқитувчилар дарс ўтишади. Талабалар шу маърузага узоғи билан 40-50 дақиқа диққатини жамлай олади, холос. Натижада маърузанинг қолган қисмини талабанинг мияси қабул қилмай қолади. Бу табиий ҳолат: инсон миясининг тузилиши шунақа. Таклифим шундан иборатки, 1 пара дарсни 80 дақиқа эмас, 45-50 дақиқагача тушириш керак. Фикри ожизимча, бу йўл ўзини оқлайди. Чунки 2020/2021-ўқув йилининг ноябр-декабр ойларида пандемия сабабли дарслар худди шунақа 45 минутгача қисқартирилганди. Буни агар ҳозирги ҳолат билан солиштирадиган бўлсак, ўша вақтда талабанинг фойдали иш коеффициенти юқорироқ бўлган деб ўйлайман”.
Ҳозирги вақтга қадар платформада мазкур таклифни қўллаб-қувватловчилар 75 фоизни, аксинча фикр билдирганлар 25 фоизни ташкил этди.
Эслатиб ўтамиз, бироз аввал Ёшлар ишлари агентлиги директори ўзининг расмий телеграм саҳифасида Ёшлар форуми якунлари бўйича ҳукумат қарори қабул қилиниши, бу қарорда айни шу каби таклифлар акс этиши мумкинлигини баён қилиб, барчани платформа орқали ўз ғоялари ва муаммоларини ёзиб қолдиришга чақирган эди.
Жавоҳирбек Турсунов
