Оғир атлетика бўйича жаҳон чемпионатига старт берилди

 

Тадбирда Халқаро Оғир Атлетика Федерацияси Президенти Майкл Ирани мусобақа юқори савияда ташкиллаштирилганига алоҳида тўхталиб ўтди.

 

“Авваламбор, Ўзбекистон Республикаси Президенти Шавкат Мирзиёевга ушбу мусобақани юқори савияда ташкиллаштиришда бош бўлгани учун федерациямиз номидан миннатдорчилик билдириб қоламан. Шунингдек, Туризм ва спорт вазирлиги, Миллий Олимпия қўмитаси, Ўзбекистон оғир атлетика федерацияси ҳам ташкилий ишларни юқори савияда амалга оширишди. Ушбу жаҳон чемпионатида 90 га яқин мамлакатдан 500 нафар спортчи иштирок этиши кўзда тутилган. Фурсатдан фойдаланиб, бугунги мураккаб даврда барчангизга сиҳат-саломатлик тилаб қоламан”.  

 

Мамлакатимиз номидан Бош вазир ўринбосари, Туризм ва спорт вазири Азиз Абдуҳакимов сўзга чиқиб, мусобақа иштирокчиларига самимий тилакларини билдириб ўтди:

 

“Барчангизни юртимизда илк бор ўтказилаётган жаҳон чемпионатида кўриб турганимиздан хурсандмиз. Нуфузли мусобақаларни қабул қилиш орқали дунё ҳамжамиятига Янги Ўзбекистоннинг имкониятларини кўрсатмоқдамиз. Оғир атлетика бўйича сўнгги икки Олимпия ўйинларида вакилларимиз олтин медални қўлга киритиб келаётгани, яқинда Саудия Арабистонида ўтган ўсмирлар ўртасидаги жаҳон чемпионатида ёшларимиз кучли учликдан ўрин олгани бу спорт тури яна-да ривожланиб бораётганидан дарак беради. Мусобақада барча иштирокчиларга омад тилайман”.

 

Аввалроқ жаҳон чемпионатида қатнашадиган оғир атлетикачиларимиз маълум бўлгани ва Тошкентда жаҳон чемпионати бошланаётгани ҳақида хабар берилганди.

 

Жамшидбек Амиров