Бизга бокс муҳимми ёки муҳокамадаги қонунлар?
Бугун Олий мажлис қонунчилик палатасининг навбатдаги ялпи мажлиси бўлиб ўтди. Бироқ…
Ундаги жараёнлар телевидение орқали кенг жамоатчилик кузатуви остига олиниши кўп бора таъкидланаётган эди. Бироқ эҳтимол эфирнинг чеклангани бунга халал бергандир, эфир 48:48 минут давом этиб, сўнг узиб қўйилди.
Бунга Олий Мажлис Қонунчилик палатаси расмий тушунтириш берар экан, Телеграм каналида қуйидагича хабар қолдирилди:
"UzReport" телеканали аввалдан режалаштирилган бокс бўйича Ўзбекистон чемпионатини соат 11:00дан бошлаб эфирга узатиш мақсадида Қуйи палата мажлисини эфирга узатишни тўхтатган".
Шу ўринда ҳақли савол туғилади: Бизга бокс муҳимми ёки бутун бир халқнинг тақдирига дахл қиладиган қонунлар?
Ажабланарлиси, ОАВ да ялпи мажлисни ёритадиган манба биттагина "UzReport" эмаску. Қаердаги сериаллар-у, шоулар тарғиб қилинадиган телеканалларни айни вақтда санашга бармоқ етмайди.
Ижтимоий тармоқлар орқали ҳам кузатиш имкони борлиги айтилаётган ялпи мажлис йиғилиши худди телевидениедаги каби 48:48 минутда тўхтатилганига қандай изоҳ бериш мумкин? Халқ учун қоғозга кўчаётган қонунлар эмас, муҳокама жараёнлари муҳим эмасми? Депутатларни шу халқ сайлаган экан, улар аслида кимнинг манфаати учун ишлаётганини кўриши керакку.
Ҳўш, бу қарийб 49 минут давом этган эфирда қайси масалалар кўтарилди?
Мазкур саволга “ҳеч қандай” деб жавоб беришнинг ўзи кифоя. Чунки давлат мадҳияси, “олиб борилаётган ислоҳотлар”, инсон ҳуқуқлари ва коррупциянинг олдини олиш учун қилинаётган чора-тадбирларнинг мақталгани - масала кўтарилди ёки ҳал қилинди дегани эмас.
Бундай ими-жимида ўтказилар экан, унда нима учун жонли узатилиши ҳақида эълон берилди. Бу шаффофликнинг қуруқ гап эканлигиданми ёки очиқликнинг очилмаслигиданми? Ёки бу ерда қандайдир ишора мавжудми?
Албатта бу ҳолат ҳали кўплаб муҳокамаларга сабаб бўлади. Сабаб бўлиши ҳам керак!
Оламгир Абдиев
