Болливуд юлдузи Катрина Каиф ўзидан 5 ёш кичик актёрга турмушга чиқди

 

“Токи ҳаёт эканман”, “Тезлик-3”, “Кўҳинур олмоси изидан” сингари фильмлардаги роли билан яхши таниш бўлган актриса бир вақтлар Салмон Хон, кейинроқ эса Ранбир Капур билан учрашган.

 

У билан муносабатларига нуқта қўйгандан кейин эса шахсий ҳаёти билан боғлиқ маълумотларни сир тутишга уринган.

 

Тўйдан аввал актриса“Масаан”, “Зубаан” фильмларида суратга тушган Вики Каушал билан 2019 йилдан буён учрашиб юргани ва уларнинг турмуш қуришга қарор қилгани ҳақида миш-мишлар тарқалди.

 

Бу гаплар бежизга эмаслиги ва жуфтлик муносабатларини шу ҳафта никоҳ ришталари билан мустаҳкамлаши маълум бўлди.

 

 

Актрисанинг барча қариндошлари аллақачон Ҳиндистонга учиб келган. Бўлажак эр-хотин маросимни ўтказиш учун Ражастон штатига жўнаган. Ташриф буюрувчилар учун меҳмонхонадаги 42 та номер 3  кунга банд қилинган.

 

Стриминг платформаларидан бири тўй суратлари учун Катринага 1 миллиард рупий (13 миллион доллар) таклиф қилган.

 

Ғарбдаги юлдузлар орасида тўйдаги фото ва видеоларни сотиш кенг тарқалган, аммо Каифнинг бунга рози бўлиш ёки бўлмаслиги ҳозирча номаълум.

 

 

Маълумот ўрнида: Катрина Каиф 1983 йилда Гонконгда ҳиндистонлик Муҳаммад Каиф ва инглиз миллатига мансуб Сюзанна Тюркотт оиласида туғилган.

 

Ўз карьерасини 14 ёшида модель сифатида бошлаган Каиф илк бор 2003 йил  "Бум” фильмида суратга тушган. Унинг бўлажак турмуш ўртоғи Вики Каушал эса 1988 йилда Мумбайда дунёга келган.

 

Ражив Ганди номли технология институтини тамомлаган Вики актёр сифатидаги фаолиятини 2012 йилда суратга олинган “Вассейпур тўдалари” фильмида роль ижро қилишдан бошлаган.

 

Эслатиб ўтамиз, аввалроқ Дунё юлдузларининг қўлларини безаб турган никоҳ узукларининг нархи қанчалиги ҳамда турк актёри Халит Эргенч учинчи маротаба ота бўлгани ҳақида хабар берилганди.

 

 

Чўлпоной Аҳмедова