Янги йил тадбирлари фақат бошланғич синф ўқувчилари учун ўтказилади
Халқ таълими вазири ўринбосари Ваҳоб Ражабов маҳаллий бошқармалар раҳбарлари ва вазирлик тасарруфидаги мактаблар раҳбарларига мурожаат қилди.
Ушбу хат Хоразм вилояти Халқ таълими бошқармаси ахборот хизмати томонидан эълон қилинди.
Вазирлик умумтаълим мактабларида Янги йил байрамини нишонлаш билан боғлиқ қуйидаги ҳолатлар тақиқланганини маълум қилди:
юқори синф ўқувчилари иштирокида янги йил байрамини нишонлаш билан боғлиқ тадбирларни ўтказиш;
байрам тадбирларини ўтказиш мақсадида ота-оналардан турли хил ноқонуний пул йиғимларини амалга ошириш;
мактаб фойеси ва синф хоналарни сунъий арча ва электр чироқлари билан безаш.
Шунингдек, умумтаълим мактабларида Янги йил байрамини нишонлаш билан боғлиқ қуйидаги ҳолатларга рухсат берилди:
истисно тариқасида фақатгина бошланғич синф ўқувчиларига синф раҳбари ҳамда ота-оналар иштирокида карантин қоидаларига риоя қилган ҳолда ўз синф хоналарида дарс жараёнларига ҳалақит бермаган ҳолда байрам тадбирларини ўтказишга;
мактаб фойеси ва синф хоналарни фақатгина ўқувчилар қўл меҳнати билан ясалган турли безаклар билан безатишга;
мактаб ҳовлисида Янги йил арчасини безашга.
Эслатиб ўтамиз, аввалроқ мактаб ўқувчилари учун қишки таътил 28 декабрдан бошланиши ҳақида хабар берилганди.
