Хитойда рақамли “прокурор” ихтиро қилинди
Хитойлик олимлар прокурорларнинг ишини енгиллаштиришга ёрдам берадиган рақамли тизимни яратди.
Сунъий интеллект ишнинг оғзаки баёни асосида айблов хулосасини 97 фоиз аниқлик билан тақдим этиши мумкин.
Қурилма Шанхайнинг Пудун тумани прокуратурасида синовдан ўтказилган. Олимлар янги ихтиро прокурорларнинг кундалик ишларини енгиллаштириш, уларнинг эътиборини нисбатан мураккаб масалаларга қаратиш учун имкон яратишига умид қилмоқдалар.
Тизим яқин келажакда айблов хулосаларини тақдим этишда прокурорлар ўрнини эгаллаши кутилмоқда.
Сунъий интеллект 2015 йилдан 2020 йилгача кўриб чиқилган 17 мингта иш асосида қарор чиқаришга ўргатилган.
Айни вақтда сунъий интеллект кредит карталари билан боғлиқ товламачилик, қимор, ҳайдовчилар томонидан қонун бузилиши ҳолатлари, қасддан тан жароҳати етказиш, ўғрилик, товламачилик каби ҳолатларга нисбатан айблов хулосаларини тақдим этган.
Эслатиб ўтамиз, аввалроқ Японияда COVID-19 зарралари билан алоқа қилганда нур сочувчи ниқоб яратилгани ҳамда Япониялик олимлар одам организмидаги қариш жараёнини секинлаштирувчи вакцинани синовдан ўтказгани ҳақида хабар берилганди.
Чўлпоной Аҳмедова
