Meta қарийб 900 млн доллар жаримага тортилди: компания фойдаланувчиларнинг шахсий фото ва видеоларига розиликсиз кирган
Meta қарор устидан шикоят қилишини билдирди.
Италия маълумотларни ҳимоя қилиш агентлиги Meta компаниясини Android қурилмалари фойдаланувчиларининг фото ва видеоларига уларнинг алоҳида розилигисиз киргани учун 805 миллион евро (тахминан 887 миллион доллар) жаримага тортди. Бу ҳақда Reuters хабар берди.
Агентлик маълумотига кўра, Facebook иловасидаги фойдаланувчиларга телефон галереясидаги сурат ва видеолар асосида постлар учун контент тавсия қилувчи функция орқали шахсий файлларга кирилган. Бунда фойдаланувчилардан айнан ушбу функция учун алоҳида розилик олинмаган ва уларга бу ҳақда етарлича маълумот берилмаган.
Италия регулятори Meta компаниясига функцияни дастлабки ҳолатда ўчириб қўйиш ва ундан фойдаланиш учун фойдаланувчилардан алоҳида розилик олиш мажбуриятини юклади. Бунинг учун компанияга 60 кун муддат берилди.
Meta вакилининг Reuters агентлигига маълум қилишича, компания қарор устидан шикоят қилади. Унинг таъкидлашича, ушбу функция фойдаланувчиларга Facebook’да сурат ва видеоларни улашишда ёрдам беради. Функция ишлаши учун фойдаланувчилар қурилма созламаларида тегишли рухсатни бериши керак ва уни исталган вақтда ўзгартириши мумкин. Компания жаримани номутаносиб деб ҳисобламоқда.
Reuters қайд этишича, 2025 йилда бошланган текширув Meta фойдаланувчиларнинг фото ва видеоларидан сунъий интеллект моделларини ўқитишда фойдаланган-фойдаланмаганини қамраб олмаган. Meta бундай мақсадда маълумотлардан фойдаланилганини аввал ҳам рад этган.
Шунингдек, Италия маълумотларни ҳимоя қилиш агентлиги 2026 йилда ишга туширилган, фойдаланувчиларнинг галереясидаги контентни булутли тизимда қайта ишлаш имконини берувчи янги функцияни алоҳида ўрганиш ҳуқуқини сақлаб қолган.
