Бўстонлиқда “Snow Polo Amirsoy CUP-2022” мусобақаси ўтказилди

 

Тошкент вилояти Бўстонлиқ туманидаги Чимён тоғида денгиз сатҳидан 2 200 метр баландликда қор полоси бўйича 2-анъанавий “Snow Polo Amirsoy CUP-2022” мусобақаси ташкил этилди.

 

Унда “Milliy gvardiya Polo Club”, “OFB Polo Club” (Orient Finans bank), “Ot sporti maktabi” ҳамда “NRG Polo Club”  жамоалари иштирок этди.

 

Дастлаб жамоалар ярим финалда ўзаро куч синашишди. Қуръа натижасига кўра, ярим финалнинг дастлабки ўйинида “OFB” жамоаси Миллий гвардия қошидаги от спорти бўйича Республика олий спорт маҳорати мактаби ходимларидан ташкил топган жамоасини яққол устунлик билан 8:1 ҳисобида мағлуб этди.

 

Иккинчи ярим финал жуфтлигида “NRG Polo Club” жамоаси аъзолари мусобақада ғолибликка асосий даъвогар “Milliy gvardiya” поло жамоасига кичик 2:1 ҳисобида имкониятни бой беришди.

 

Ҳал қилувчи финал баҳсида эса миллий гвардиячилар “OFB Polo Club” устидан 3:1 ҳисобида ишончли ғалабага эришди ва “Snow Polo Amirsoy CUP-2022” мусобақаси ғолибига айланди. Бу “Milliy gvardiya” полочиларининг ушбу йўналишдаги мусобақаларда қўлга киритган илк соврини сифатида тарихга кирди.

 

Аввалроқ, Тошкент шаҳрида поло бўйича “Mustaqillik kubogi-2021” мусобақаси бошлангани ҳақида хабар берилганди.

 

Жамшидбек Амиров