Рангник Донни ван де Бекга имкон бермоқчи
“Манчестер Юнайтед” бош мураббийи Ралф Рангник голландиялик ярим ҳимоячи Донни ван де Бекнинг мавсум охиригача жамоада қолишини истамоқда.
Бу ҳақда инсайдер Фабрицио Романо ўзининг twitter саҳифасида маълум қилди.
Манбанинг хабарига кўра, клуб ҳали футболчининг келажаги борасида аниқ бир қарорга келмаган. Аммо бош мураббийнинг футболчини жамода олиб қолиш истаги бўлишига қарамай, ярим ҳимоячининг ижара асосида бошқа жамоага ўтиб кетиши эҳтимоли ҳамон мавжуд. Ҳозирча футболчи ҳеч қайси клуб билан музокара ўтказмаган. Аввалроқ футболчи янги клуб топиш умидида агентини алмаштирган эди.
Эслатиб ўтамиз, голландиялик футболчи жорий мавсумда Манчестер клуби сафида барча турнирлар доирасида 13 та ўйинда майдонга тушиб, атиги 1 та гол урган.
Маълумот ўрнида: ярим ҳимоячи “Манчестер Юнайтед”да 2020 йилдан буён ўйнаб келмоқда, у Манчестер клубига “Аякс”дан 39 миллион евро эвазига ўтган эди. Ван де Бекнинг клуб билан шартномаси 2025 йилнинг июнигача амал қилади.
Аввалроқ, Криштиану Роналду “Манчестер Юнайтед”дан кетмоқчи эканлиги ҳақида хабар берилганди.
Жамшидбек Амиров
