Бухорода футбол ўйини муштлашувга айланди
Бухоро вилоятида футбол ўйини вақтида оммавий жанжал келиб чиқди.
Шундан сўнг вилоят Ички ишлар бошқармаси ҳолат юзасидан маълумот берди.
Хабарга кўра, 5 февраль куни Бухоро вилояти Жондор тумани "Нурафшон" маҳалласининг Мохон қишлоғида жойлашган стадионда Тобагар ва Чандир қишлоқлари фуқаролари ўзаро футбол ўйини ўйнаган ҳамда мазкур ўйин пайтида оммавий жанжал келиб чиққан.
Маълум бўлишича, мазкур видеолавҳа Бухоро вилояти Ички ишлар бошқармаси масъул ходимлари томонидан ўрганилган. Ўйин давомида содир бўлган жанжал ва бу жараёнда бирор бир фуқаронинг тан жароҳати олганлиги тўғрисида фуқароларнинг ўзи ёки бошқа шахслар томонидан Ички ишлар бошқармасининг 102 автоматлаштирилган тизимига, тиббий муассасаларга, 103 қисқа рақамли тез ёрдам хизматига, туман ИИБ навбатчилик қисми ва ҳудудий профилактика инспекторига мурожаат келиб тушмаган.
“Ҳолатга ва ушбу фуқароларнинг шахсига аниқлик киритиш ҳамда уларнинг ҳатти-ҳаракатларига қонуний баҳо бериш мақсадида Бухоро вилояти Ички ишлар бошқармаси ҳамда Жондор тумани Ички ишлар бўлими ходимлари томонидан тезкор суриштирув ва терговга қадар текширув ҳаракатлари олиб борилмоқда. Олиб борилган терговга қадар текширув ҳаракатлари юзасидан қўшимча маълумот берилади”, — дейилади вилоят Ички ишлар бошқармаси хабарида.
