Мессининг сиз билган ва билмаган шахсий бизнеслари
5 йил ичида Лио ўзининг аввалги ўн йилликдаги даромадини ишлаб топди.
Аргентиналик маҳоратли футболчи Лионель Мессининг шахсий бизнеси ва асосий даромад топадиган соҳалари кўпчилик мухлисларни қизиқтириши турган гап. Ҳозирда Франциянинг “ПСЖ” клубида туп сураётган футболчининг парижликлар сафидаги йиллик маоши 40 миллион еврони ташкил этади. Zamon.uz ҳужумчининг футболдан ташқари бизнеслари ҳақида маълумотларни тақдим этади.
У “Adidas”нинг юзи бўлиб келмоқда
Реклама фаолияти Мессининг иккинчи энг катта даромад келтирадиган соҳаси ҳисобланади. Лио бунда йилига 20 млн евродан кўпроқ даромад келтирадиган маркетинг кампанияларининг таниқли брендлари билан ҳамкорлик қилади. 2010 йилда футболчи “Pepsi”, “Adidas”, “Gillette” компаниялари билан шартномалар тузган. 2011 йилда Месси Хитойнинг автомобиль концерни – “Chery”, “Audemars Piquet” соат бренди ва “AirEuropa” авиакомпанияларининг рекламасида иштирок этди. Кейинроқ ҳужумчи “EA Sport”, “Herbaline” va “Dolce & Gabbana” компаниялари билан шартнома имзолади. Кўп йиллар давомида Лионинг асосий реклама ҳамкори “Adidas” бўлиб келган. Яқинда компания футболчи билан муддатсиз шартномага келишиб олди. Худди шундай келишув “Nike” бренди билан ҳам тузилган. Лионель Месси бир неча йиллардан бери “Adidas” компаниясининг юзи бўлиб келмоқда.
Месси 40 метрлик осмонўпар бинонинг эгаси ҳисобланади
Лио молиявий инвестицияларининг муҳим қисми кўчмас мулкни сотиб олиш ва қуришга қаратилган. “Jendill Di” корпорацияси билан ҳамкорликда ҳужумчи Барселона шаҳри чеккасида “Rostower” биносини қурган. Месси 2009 йилда ўзининг туғилган шаҳри Росарио марказида 40 метрлик осмонўпар иншоотни ишга туширган эди. Кўп қаватли биноларни қуришдан ташқари, Лио элита тураржой мажмуасини қуришга ҳам катта миқдорда сармоя киритган. Таниқли экспертларнинг фикрича, фермер хўжаликларини сотиб олиш ва сотиш, тураржой мажмуаларини қуриш ва кўчмас мулкни ривожлантиришга қаратилган “Limecu 2010 SA” бизнес лойиҳаси Лионельнинг энг фойдали сармояси ҳисобланади. Шунингдек, футболчи Барселона шаҳрининг қоқ марказида, “Enrike Granados” кўчасида ҳашаматли ресторан очган.
Меҳмонхонасининг бир кунлик ижара нархи 600 доллар
2017 йилда Лионель Ситгес шаҳрида жойлашган тўрт юлдузли курорт меҳмонхонанинг эгасига айланди. Мавжуд маълумотларга кўра, футболчи бинони 30 млн еврога сотиб олган. 2018 йил апрель ойида Британиянинг “The Sun” нашриётининг навбатдаги сони ҳужумчининг энг йирик харидларидан бири – “Ibiza” оролида жойлашган меҳмонхонани эълон қилди. Келишувга жалб қилинган сумма матбуотга ошкор қилинмаган. Айтилишича, меҳмонхона хонасини кунига 600 доллардан ижарага олиш мумкин.
Мессининг вино заводи
Месси Аргентинанинг етакчи вино заводи билан биргаликда вино ишлаб чиқаришни ҳам йўлга қўйган. 2010 йил Аргентина бозоридаги етакчи компаниялардан бири “Casa Bianchi” вино заводи билан ҳамкорликда Месси “LИO” бренди остида вино ишлаб чиқара бошлаган. Маркетинг компанияси шиори “Арслон, креатив моҳият” ҳисобланади. У ҳужумчининг ажойиб ижодий қобилиятларини идеал тарзда акс эттиради ва Мессининг ўйинини мухлислар кўп йиллар завқ билан томоша қилишади деган маънони билдиради. “Lиo Premium Malbec” — бу олхўри ва резаворлар асосида тайёрланган қуруқ қизил шаробнинг янги маркаси бўлиб, ҳар бир шишаси 12 доллардан сотилади.
Прогноз қилинган даромадлар
Агар клубдаги маош, рекламадан тушган даромад ва бизнесдаги иштирокини ҳисобга оладиган бўлсак, ҳар қандай ҳолат машҳур спортчига таҳдид сололмайди. Молиявий имкониятлар ва инвестиция фаолияти тўғрисидаги маълумотларга асосланилса, кейинги 5 йил ичида Лио ўзининг аввалги ўн йилликдаги даромадини ишлаб топган. Бу сумма 550 млн долларни ташкил этади.
