"Таваккал қилганим менга қимматга тушди"

 

Пекин-2022 қишки Ўзбекистон шарафини тоғ чанғиси спорт тури бўйича ягона спортчимиз Комилжон Тўхтаев ҳимоя қилди. Чанғичимиз дастлаб гигант слалам йўналишида 29-ўринни қўлга киритган бўлса, слалам дастурида муваффақиятсизликка учради.

 

Мусобақадаги иштирокини Комилжон Тўхтаев қандай баҳолайди? Олимпиaда унга нима берди? Шу саволлар билан спортчига юзландик: 

 

“Қишки Олимпия ўйинлари жуда қизиқарли ўтди. Мусобақа менда катта таассурот қолдирди. Олимпия ўйинларида ўзимга ишонч ва мотивация олдим. Мени кўплаб одамлар қўллаб-қувватлади. Уларнинг илиқ муносабатлари янада руҳлантирди”.

 

Комилжон Тўхтаев мусобақадаги иштироки ҳақида алоҳида тўхталиб ўтди.

 

“Олимпиaдага кучли тайёргарлик кўриб боргандим. Дастлаб, гигант слалам дастурида ўзим учун жуда яхши натижага эришдим. Унда 87 спортчи орасида 29-поғонани банд этдим. Ушбу натижам орқали осиёлик атлетларнинг барчасини ортда қолдирдим. Мусобақа олдидан мухлисларга берган ваъдамни бажардим. Аммо слалом дастури муваффақиятсиз ўтди. Мазкур босқичда таваккал қилганим менга қимматга тушди. Стартни жуда яхши бошлагандим. Бироқ финишга оз қолганда хатога йўл қўйдим”.

 

Спортчимиз кейинги мусобақаларда юртимиз шарафини муносиб ҳимоя қилишини айтди.

 

“Мен Пекин Олимпиaдасида ўзимни ғолиб сифатида биламан. Сабаби, энг юқори кўрсаткичимни қайд этдим. Осиёда тенгсизга айландим. Қишки Олимпиада кўп маблағ талаб этади. Тоғ чанғиси ҳам қиммат спорт турларидан бири ҳисобланади. Кейинги Олимпиа ўйинларида янада яхшироқ натижа учун курашаман”.

 

Жамшидбек Амиров