“Насаф”га белгиланган трансфер тақиқи олиб ташланди
Клуб франциялик футболчи билан шартнома шартларини бажармаганди.
FIFA франциялик футболчи Абделае Диаките билан боғлиқ вазият учун “Насаф”га белгилаган трансфер тақиқини олиб ташлади.
2021 йилнинг 7 октябрь куни FIFA Низоларни ҳал этиш палатаси “Насаф” жамоаси ва франциялик футболчи Абделае Диаките ўртасидаги низоли вазият юзасидан қарор чиқарган эди. Унга кўра, “Насаф” футболчи билан тузилган шартнома шартларини бажармаган.
Қайд этилишича, футболчи FIFA’га мурожаат қилган ва ташкилот “Насаф” футбол клуби зиммасига белгиланган қарздорлик ва жарима тўловларини 45 кун мобайнида тўлаб бермагани сабаб трансфер тақиқи белгилаган эди.
“Насаф” 24 февраль куни ушбу футболчи билан қарздорликни тўлаш бўйича тинчлик битими имзолади ва FIFA’га тақиқни олиб ташлаш бўйича мурожаат юборди.
25 февралдан эътиборан FIFA ушбу иш доирасида “Насаф”дан трансфер тақиқини олиб ташлади.
Аввалроқ, Қарши клуби Ўзбекистон кубогини қўлга киритгани ҳақида хабар берилганди.
Жамшидбек Амиров
