“Ўзагроинспекция” бошлиғи "ҳамир учдан патир" олаётганда қўлга тушди
Қашқадарёда яна бир мансабдор ўзига берилган ишончни суиистеъмол қилди.
Бу ҳақда Ўзбекистон Республикаси Бош прокурорининг матбуот котиби хабар берди.
Шунингдек, Қашқадарё вилояти прокуратурасига кўра, “Ўзагроинспекция” Нишон тумани бўлими катта инспектори Р.Ш. фуқаро О.Б дан ўзига тегишли трактори учун техник ҳужжат расмийлаштириб бериш эвазига 3 миллион сўм пора талаб қилиб, шундан 1 миллион сўмини олдиндан олиб, 3 март куни қолган 2 миллион сўмни олаётган вақтида қўлга олинган.
Ҳозирда мазкур ҳолат юзасидан вилоят прокуратураси томонидан ЖКнинг 210-моддаси (пора олиш) билан жиноят иши қўзғатилиб, дастлабки тергов ҳаракатлари олиб борилмоқда.
