Давлат пуллари тўғри сарфланган — Коррупцияга қарши курашиш агентлиги раҳбари
Акмал Бурхонов Кинематография агентлиги фаолияти атрофидаги "деди-деди"ларга ойдинлик киритилди.
Бу ҳақда Коррупцияга қарши курашиш агентлиги 10 март куни Тошкентда бўлиб ўтган Агентлик фаолиятига бағишланган матбуот анжуманида маълум қилди. Текширишлар давомида Фирдавс Абдухолиқов томонидан давлат маблағлари ўзлаштирилмагани тасдиқланган.
“Мен бир нарсага аниқлик киритмоқчиман. Кинематография агентлиги масаласида “Нима учун маъмурий жавобгарлик, кичкина пул билан жиноий жавобгарлик? Қамалганлар ҳам бўлган”, деб кўплаб муҳокамалар бўлди. Бир нарсани айтиш керакки, бу ерда давлат маблағлари ноқонуний ўзлаштирилган ёки давлат маблағининг кимнингдир киссасига кетган ҳолати йўқ.
Бу ерда харидларни амалга оширишда, яъни танловни эълон қилишда манфаатлар тўқнашуви борлиги тўғрисида хабар қилмаганлиги ҳақида гап кетяпти. Ажратилган пуллар қонуний ишлатилган. Яъни у пулларни ноқонуний сарфлаш ҳолати бўлмаган. Берилган буюртма асосида материал тайёрлаб берилган.
Пуллар тўғри сарфланган. Гап шу ҳақда кетяпти. Бу ерда айнан манфаатлар тўқнашуви борлиги тўғрисида ўзини четлаштирмагани ҳолати бўйича маъмурий жавобгарлик берилган. Яъни шунча пулни кимдир еб юбориб, давлат бюджети талан-торож қилингани ҳолати эмас. Шуни эътиборга олишингизни сўраб қолар эдик.
Прокуратура идоралари томонидан ўрганилганда, бу маблағлар талан-торож қилинмагани, агарда талон-торож қилинганида Жиноят кодексининг тегишли моддалари билан жавобгарликка тортилар эди”, — дейди А.Бурҳонов
