Ташқи қарз олиш янги тартибда назорат қилиниши мумкин
Унда корхонанинг молиявий аҳволи инобатга олинади.
Вазирлар Маҳкамасининг "Давлат иштирокидаги корхоналар томонидан ташқи қарзларни жалб қилиш тартибини такомиллаштириш чора-тадбирлари тўғрисида"ги 107-сон қарорида қабул қилинди.
Унга кўра, 2022 йил 1 майдан бошлаб:
— ташқи қарзни жалб қилиш ва уни тақдим этишни тартибга солиш мақсадида давлат иштирокидаги корхоналар, молиявий ҳолатига кўра, "паст хатарли", "ўрта хатарли" ва "юқори хатарли" тоифаларга автоматик тарзда тоифаланади;
— жалб этиладиган ташқи қарз миқдори давлат иштирокидаги корхоналарнинг бизнес-режасида акс эттирилади.
— Чора-тадбирлар давлат унитар корхоналари ва устав капиталида давлат улуши 5 фоиз ва ундан ортиқ бўлган хўжалик жамиятлари ва устав капиталининг 5 фоизи ва ундан ортиқ миқдорда давлат улушига эга юридик шахсга тегишли бўлган юридик шахслар томонидан ташқи қарзни жалб қилиш ва улардан фойдаланиш устидан назорат ўрнатишга йўналтирилган.
Ҳужжат билан қуйидагилар белгиланди:
— давлат иштирокидаги корхоналарнинг жалб қилинадиган ташқи қарзга хизмат кўрсатиш харажатлари (фоиз ставкаси, комиссия ва бошқа тўловлар йиғиндиси)нинг юқори чегараси Давлат харидлари очиқ ва шаффоф амалга оширилишини таъминлаш бўйича республика комиссияси (кейинги ўринларда – Республика комиссияси) томонидан ҳар чоракда белгилаб борилади;
— давлат иштирокидаги корхоналарнинг ташқи қарзлар ҳисобидан молиялаштириладиган лойиҳаларнинг техник-иқтисодий асосларини ва бошқа ҳужжатларини ваколатли органларда экспертизадан ўтказиш Республика комиссиясининг ижобий хулосаси ёки унинг хабардор қилинганлигини тасдиқловчи ҳужжатлар тақдим этилганидан кейин амалга оширилади.
Қарор билан Давлат иштирокидаги корхоналар томонидан ташқи қарзларни жалб қилиш тартиби тўғрисидаги низом тасдиқланди. Низом ташқи кредит жалб қилиш учун Республика комиссиясидан рухсат олиш ҳамда давлат иштирокидаги корхоналарнинг ҳолати ва фаолиятини мониторинг қилишни тартибга солади.
Маълумот ўрнида: давлат ташқи қарзи ЙИМ ҳажмининг 60 фоизидан ошмаслиги белгиланганди.
Эслатиб ўтамиз, аввалроқ Ўзбекистоннинг давлат қарзи қарийб 26,5 миллиард АҚШ долларига етгани ҳақида хабар берилганди.
