Сўнгги 5 йилда мажбурий меҳнатга қарши қаратилган 32 норматив-ҳуқуқий ҳужжат қабул қилинди
Сенатнинг йигирма тўртинчи ялпи мажлиси бошланди. Танзила Норбоева пахтага қўйилган бойкотнинг бекор қилинишига муносабат билдирди.
“Мажбурий меҳнат масаласига эътибор берилмагани ортидан 2009 йилда “Cotton Campaign” халқаро коалицияси Ўзбекистон пахтасига бойкот эълон қилганди. Оқибатда, 330 дан ортиқ йирик компаниялар бу тақиққа амал қилиб келди. Ўзбекистон катта салоҳият ва имкониятга эга бўлса-да, 13 йил давомида биз бу бойкотдан азият чекиб келдик”, — деб қайд этди Сенат раиси.
Унинг сўзларига кўра, сўнгги йилларда мажбурий меҳнатни бутунлай йўқ қилишга қаратилган катта ишлар амалга оширилди. Хусусан, энг аввало, катта сиёсий ирода кўрсатилди. Иккинчидан, қонунчилик базаси мустаҳкамланди. Норбоева сўнгги 5 йилда мажбурий меҳнатга қарши қаратилган 32 норматив-ҳуқуқий ҳужжат қабул қилинганини маълум қилди.
Танзила Норбоева бойкотнинг бекор қилиниши катта аҳамиятга эга эканини таъкидлади. Сенат раҳбари мажбурий меҳнат ва одам савдосига қарши курашда фаол ёрдами учун вазирликлар, фуқаролик жамияти фаоллари, журналист ва блогерларга миннатдорлик билдирди.
Сенатнинг йигирма тўртинчи ялпи мажлиси давом этмоқда.
