Барсанинг энг ёш мусулмон юлдузи
Уни Мессига қиёслашмоқда. Каталония клуби бу истеъдодга ишонади.
Бугунги кунда Каталониянинг Барселона клубида бир қатор ёш истеъдодли футболчилар етишиб чиқмоқда. Уларга Педри, Гави, Ансу Фати каби футболчиларни мисол қилиб келтиришимиз мумкин. Бугун Каталония клубининг келажаги дея тахмин қилинаётган Ансу Фати ҳақида тўхталмоқчимиз.
Оилавий футбол “жамоаси”
Анссумане Фати 2002 йил Гвинея-Бисау пойтахти Биссау шаҳрида туғилган. Бу Ғарбий Африкадаги Сенегал ва Гвинея ўртасидаги давлат. Фати 6 ёшига қадар онаси Лудрес Фати билан Гвинея-Бисауда яшаган. Отаси Бори Фати Ансу туғилишидан олдин Португалияга ишлаш учун кетган.
Фатининг отаси собиқ футболчи бўлган. Португалияга боргандан сўнг у қуйи лигаларда ўйнаб, пул топишга ҳаракат қилган. Ўшанда Бори португал матбуотида Испаниянинг Мариналеда шаҳридан ишга таклиф этишаётгани ҳақида ўқиб қолади. Шундан сўнг у Мариналандда ахлат машина ҳайдовчиси сифатида ишлайди. Кейинчалик Бори Эррера шаҳрига кўчиб ўтади.
Фатилар оиласи жами 5 нафар боладан иборат эди. Улар Ансу, унинг акалари Браима, Мигел, опа-сингиллар Жени ва Жуку. Браима ва Мигел ҳам футболчи ҳисобланади. Браима 2019/20 йилги мавсумда “Калаҳорра” клубида ижара асосида ўйнамоқда. Кичик укаси Мигел эса Мессининг ўғли Тиаго билан дўст, улар ҳозирда “Ла Масия”да шуғулланишади.
Ансу Фати 6 ёшида онаси билан Эррерадаги отасининг олдига кўчиб боради. У Эррерада болалигининг кўп қисмини ўтказади ва маҳаллий “Пелотерос де Эррера” мактабида футбол ўйнай бошлайди. Фати 2010 йилда “Севиля” академиясига ўтишдан олдин “Пелотерос”да уч йил тўп сурган.
“Севиля”да Фатига “Реал” ва “Барселона” клублари қизиқиш билдиради. Иккала клубнинг скаутлари Ансу учун жиддий курашади. “Реал” кўпроқ пул таклиф қилган бўлишига қарамай, “Ла Мациа” директори Алберт Пуиг Фатини “Барселона”га ўтишга кўндиради. Шундан сўнг Фати “Барселона”га 2012 йил 10 ёшида келиб қўшилади.
“Ла Лига” тарихига ўзгартириш киритган болакай
Бугунги кунга қадар Фати “Барселона”нинг энг ёш футболчиси сифатида бир қанча рекордларни ўрнатди. Футболчи Ла Лигадаги дебютини 2019 йилнинг 25 август куни “Реал Бетис”га қарши ўйинда ўтказди. Август ойи охирида “Барселона”нинг ҳужум чизиғида жароҳатланган футболчилари кўп бўлгани учун асосий таркибда ўйнайди. Ўша вақтда Лионел Месси, Луис Суарес ва Усмон Дембеле касалхонада эди. Фати ўша ўйиннинг 78-дақиқасида майдонга тушади. Шу тариқа Фати клуб тарихидаги иккинчи энг ёш дебютант номига эга бўлди. “Барса”нинг энг ёш дебютанти Висенс Мартинес бўлиб, у клуб сафида 1941 йилда “Реал”га қарши 16 ёшу 280 кунлигида дебют қилган. Фати Мартинесдан 18 кун кеч дебют қилган эди.
2019 йилнинг 31 август куни Фати “Осасуна” билан ўйинда “Барселона” сафида биринчи голни уради. Шундан сўнг у асосий жамоада гол урган энг ёш “Барселона” футболчисига айланади (16 ёш-у 304 кун).
2019 йилнинг 14 сентябрь куни “Валенция”га қарши ўйинда Фати Ла Лига тарихидаги энг ёш (16 ёшу 318 кун) гол урган ва голли узатмани амалга оширган футболчига айланди. Фати ўйиннинг 2-дақиқасида Френки Де Ёнгнинг узатмасидан гол урган бўлса, 7-дақиқада Де Ёнгга ассистентлик қилди.
17 ёш-у 40 кунликда ўрнатилган рекорд
Фати Чемпионлар Лигасидаги дебютини 2019 йил 17 сентябрь куни 16 ёшу 321 кунлигида “Боруссия Дортмунд”га қарши ўйинда ўтказди. Ҳамда “Барселона” сафида Чемпионлар лигасида дебют қилган энг ёш футболчига айланди. Фати 17 ёшу 22 кунлигида Чемпионлар лигасида ўйнаган Боян Кркичдан ўтиб кетди. Ўша ўйинда Ансу асосий таркибда майдонга тушади. 59-дақиқада эса Лионел Мессига жойини бўшатиб беради.
Фати Чемпионлар Лигаси тарихидаги олтинчи энг ёш дебютантга айланди. Чемпионлар лигасининг энг ёш дебютанти Селестин Бабаяро бўлиб, у 1994 йилда 16 ёшу 87 кунлигида Чемпионлар Лигаси гуруҳ босқичида “Андерлехт” сафида ўйнаган.
2019 йилнинг 10 декабрь куни Фати Чемпионлар лигаси гуруҳ босқичининг 6-турида “Интер” дарвозасига гол урди ва Чемпионлар лигаси тарихидаги энг ёш гол муаллифига айланди. Фати голни 17 ёшу 40 кунлигида урганди. Ўшанда Фати захирадан майдонга тушганидан бир дақиқа ўтиб “Интер” дарвозасини ишғол қилади.
Телба-тескари ўйлар. У Каталониядан кетмайди
2020 йилнинг 3 февралига қадар Фати “Барселона” сафида барча мусобақаларда 19 та ўйинда майдонга тушиб ва жами 853 дақиқани майдонда ўтказди. Шу вақт ичида у бешта гол урди ва битта голли узатмани амалга оширди.
Фати 2019 йилнинг ёзида “Барселона”ни тарк этиши мумкин эди. Ансу ва унинг отаси Барсанинг келажагига шубҳа билан қарай бошлайди. Улар Ансуни асосий жамоадан жой олишга лойиқ деб ҳисоблашади. Ёзда Фати “Барселона”ни тарк этишни ўйлаб кўрди. Уни “Боруссия Дортмунд”, “Манчестер Юнайтед” ва “Нюкасл” сотиб олишга тайёр эди. Бироқ “Барселона” Фати билан шартномани узайтирди ва унга асосий таркибда мустаҳкам ўрин олиш имкониятини берди.
“Трансфермаркт.cом” хабарига кўра, Ансу Фатининг нархи 25 миллион еврони ташкил қилади. Бу 2002 йилда туғилган футболчилар орасида энг қиммат футболчи мақомини беради. Ансу дунёнинг чап қанот ҳимоячилари орасида қиймати бўйича 32-ўринда ва дунёдаги барча футболчилар орасида 307-ўриндан жой олган.
Фати 2019 йилнинг 24 июлида “Барселона” билан 2022 йилгача шартнома имзолаган эди. “Барса” шартномадаги банддан фойдаланиб, уни 2024 йилгача узайтирди ва футболчининг товон пулини 100 миллион еврога оширди. Шартномани узайтиргани учун Фати 700 минг евро миқдоридаги мукофот пулига эга бўлди.
Ансунинг шартномасида бир шарт бор эди. Унинг акаси Браима “Барселона” билан шартномасини уч йилга узайтириши керак эди. Шундай ҳам бўлди. Бриманинг шартномаси 2020 йилнинг 30 июнида узайтирилди. Родриго Месси Фатига шартнома тузишда ёрдам берди. У Ансунинг маслаҳатчисига айланади. Родриго Лионел Мессининг акаси. Родриго Лионелга бизнесда ёрдам беради: у иккита “Majesticy Messi” меҳмонхонасини бошқаради ва “Bellavista del Jardín del Norte” ресторанининг ҳам эгасидир.
Кутилмаган таклиф
Фати 2019 йил 20 сентябрда Испания фуқаролигини олади. Кутилмаганда Ансу Бразилияда бўлиб ўтадиган ёшлар ўртасидаги жаҳон чемпионати учун Испаниянинг 17 ёшгача бўлган терма жамоасининг кенгайтирилган рўйхатига киритилади.
2019 йил 11 октабрда Ансу Карлес Перес жароҳати туфайли Испаниянинг 21 ёшгача бўлган терма жамоасига чақирилади. Фати 2019 йилнинг 15 октабрь куни 21 ёшгача бўлган Испания терма жамоаси сафида Черногорияга қарши ўйинда дебют қилади. У ушбу ўйиннинг 80-дақиқасида Марк Кукурелла ўрнига майдонга тушади.
Ҳозирги кунда Ансу терма жамоа ва клуб сафида ажойиб ўйинларни намойиш этиб келмоқда. Асосий таркибдан муқим жой эгалламоқда. Унинг келажаги борасида турли тахминлар мавжуд. Фатини Барса мухлислари Мессига қиёслашмоқда. Ўзбек мухлислари учун яна бир маълумот Ансу Фати мусулмон ҳисобланади.
Муаллиф: Жамшидбек АМИРОВ
