“Нюкасл” трансферларда яна фаоллашди
Клуб Дивок Оригини сотиб олмоқчи.
“Нюкасл Юнайтед бельгиялик “Ливерпул” ҳужумчиси Дивок Оригини ўз сафига қўшиб олмоқчи. Бу ҳақда “Calciomercato” нашри хабар берди.
Манбага кўра, инглиз клуби бельгиялик футболчининг яқинлари билан музокараларни бошлаб юборган. “Магпийлар” футболчига даъвогарлик қилаётган “Милан” билан баҳслашади.
Олдинроқ, ҳужумчи АПЛ ва Бундеслиганинг яна учта клубидан таклиф олгани, аммо “Милан”ни танлагани хабар қилинганди.
Эслатиб ўтамиз, Ориги 2014 йилдан бери “Ливерпул” сафида тўп суриб келмоқда. Бельгиялик ҳужумчи жорий мавсумда АПЛда бешта ўйинда майдонга тушиб, иккита гол урди. Шунингдек, у Чемпионлар лигасининг бешта ўйинида бир гол ва битта голли узатмани амалга оширди. Оригининг шартномаси мавсум охирида якунига етади.
Аввалроқ, “Барселона” украиналик қочқинларга ёрдам бергани ҳақида хабар берилганди.
Жамшидбек Амиров
