Минскдан Тошкентга учган самолёт бомба хавфи сабаб фавқулодда қўнди
“Uzbekistan airways” ҳолат юзасидан расмий изоҳ берди.
Авиакомпания ахборот хизматининг маълум қилишича, бугун, 11 апрель куни “Минск–Тошкент” йўналиши бўйича учувчи авиарейс 15:39 да Минск миллий аеропортидан жадвалга мувофиқ авиақатновни амалга оширишни бошлаган. “А320” ҳаво кемаси Россия ҳаво ҳудудида бўлган вақтда “Uzbekistan airways” АЖ, шунингдек, Россия ва Белоруссия авиация хизматлари ходимларининг Е-mail манзилларига аноним манзилдан ҳаво кемасида бомба жойлашгани ҳақида маълумот юборилган.
Ҳаво кемасининг йўловчилари ва экипаж аъзолари хавфсизлигини таъминлаш мақсадида, “А320” ҳаво кемаси командири самолётни текшириш ва кўздан кечириш мақсадида энг яқин Домодедово халқаро аеропортига қўнишга қарор қилган. Айни пайтда лайнер, йўловчилар, уларнинг юклари, юк ва почта белгиланган тартибда текширилди. Ҳаво кемасининг миналаштирилгани ҳақидаги маълумот тасдиқланмаган.
