Фернандино шу йил ёзда “Манчестер Сити”ни тарк этади
Футболчи Бразилияга қайтишни режалаштирмоқда.
“Манчестер Сити” яримҳимоячиси Фернандино жамоадаги фаолиятини якунлаб, Бразилияга қайтмоқчи эканини маълум қилди.
“Келаси мавсумда жамоада қоламан деб ўйламайман. Мен кўпроқ ўйнашни истайман. Шунинг учун Бразилияга қайтмоқчиман. Оилам билан бир қарорга келиб бўлдик. Бу мавсум Европадаги сўнгги йилим”, — деган Фернандино “Атлетико”га қарши ЕЧЛ чоракфинали жавоб ўйини олдидан.
Қайд этилишича, футболчининг бу гапи Гвардиола учун кутилмаган ҳол бўлган.
“Бу ҳақда билмасдим, ҳозир эшитдим. Мавсум якунлансин, кўрамиз. Нима бўлишини билмайман”, — деган Пеп.
Маълумот учун: бразилиялик 37 ёшли яримҳимоячи 2013 йилдан буён “Манчестер Сити” сафида тўп суриб келмоқда. Унинг шартномаси ёзда ниҳоясига етади. У “шаҳарликлар” сафида 4 карра АПЛ ғолиби бўлган.
