Европа Иттифоқи Яқин Шарқдаги озиқ-овқат етишмовчилига қарши курашмоқчи
Россия-Украина можароси айрим минтақаларда ғалла танқислигини келтириб чиқарди.
Европа Иттифоқи Шимолий Африка, Яқин Шарқ ва Болқон минтақасидаги озиқ-овқат ҳамда ўғит етишмовчилиги муаммосини “озиқ-овқат” дипломатияси ёрдамида ҳал қилмоқчи.
Озиқ-овқат хавфсизлигининг мавжуд эмаслиги ушбу ҳудудда жойлашган айрим давлатларнинг Россияга қарши санкциялардан норозилигига сабаб бўлмоқда. Москва эса ўз навбатида инқирозни ўзига қарши қаратилган чекловлар натижаси сифатида кўрсатяпти.
Россия президенти Владимир Путин ўтган ҳафтада Ғарб санкциялари глобал озиқ-овқат танқислиги ва энергетик манбаларнинг нархи кўтарилишига сабаб бўлганини маълум қилганди.
Яқин Шарқ ва Шимолий Африка давлатлари, айниқса, Миср ва Ливан Украина ҳамда Россия буғдойи ва минерал ўғитларига жиддий равишда қарам ҳисобланади. бу мамлакатлар Москванинг Украинага қарши ҳарбий амалиёт бошлаганидан сўнг ғалла етказиб берилиши бўйича жиддий муаммоларга дуч келди.
Бу эса ЕИнинг минтақадаги таъсирига таҳдид туғдиради. Европалик дипломатлардан бирининг сўзларига кўра, Евроиттифоқ минтақани “қўлдан бой бера олмайди”. Шунинг учун ташкилот дон танқислигининг оқибатларини юмшатиш мақсадида БМТ озиқ-овқат дастури билан ҳамкорликда янги ташаббусларни эълон қилмоқчи.
Масалан, ЕИдаги энг йирик қишлоқ хўжалиги маҳсулотлари етиштирувчи Франция “Ферма” номли лойиҳани илгари сурмоқда. У қашшоқ давлатлар орасида озиқ-овқат маҳсулотларини тақсимлаш механизмини ўз ичига олади. Париж бу ташаббус бўйича июнь ойига қадар халқаро келишувга эришмоқчи. Бу ҳақда Франция ташқи ишлар вазири Жан-Ив Ле Дриан сешанба куни Римда бўлиб ўтган ЕИ ва БМТ озиқ-овқат дастури ўртасидаги музокаралардан сўнг маълум қилди. Европанинг айрим давлатлари бошқа чораларни таклиф қилган. Масалан, Венгрия иқлим бўйича мақсадларни ўзгартириб, ЕИнинг ўзида қишлоқ хўжалик экинларини кўпайтиришга чақирган.
БМТ озиқ-овқат дастури Европа билан юқоридаги масала юзасидан музокаралар ўтказилганини тасдиқлади.
Брюссель Россиянинг озиқ-овқат танқислиги бўйича баёнотларини дезинформация сифатида баҳоламоқда. Al Jazeera билан суҳбатда бўлган дипломатлардан бири ЕИ Москва билан озиқ-овқат савдоси бўйича чекловлар жорий этмаганини айтган. Иттифоқнинг Россияга қарши чекловлари одатда озиқ-овқат тармоғини қамраб олмайди.
Бундан ташқари, Евроиттифоқ бош дипломати Жозеп Боррель РФни Украина қишлоқ хўжалик маҳсулотларининг экспортини чеклашда айблади. Унинг сўзларига кўра, Россия порт ва омборларга ҳужум уюштиришда давом этмоқда. Киев эса етарли заҳираларга эгалигига қарамай, ушбу омиллар, шунингдек, ёқилғи етишмаслиги туфайли ўз ғалласини экспорт қила олмаяпти. ЕИ экспортни Польша орқали амалга оширилишига ҳаракат қилмоқда.
Бундан ташқари, Брюссель Яқин Шарқ ва Шимолий Африкага 225 миллион евро ёрдам ажратди. Унинг ярми Мисрга йўналтирилади. Шунингдек, Ливан, Иордания, Тунис, Марокаш ва Фаластин 15 дан 25 миллион еврогача олади.
Шу билан бирга Евроттифоқ Ғарбий Болқон давлатлари қишлоқ хўжалиги учун қўшимча 300 миллион евро ажратмоқчи.
