Эрон келишувга рози бўлмаса, қаттиқ зарбага учрайди— Трамп
Доналд Трамп Теҳронни АҚШ билан эҳтимолий келишув бўйича тезроқ ҳаракат қилишга чақирди.
Доналд Трамп Эрон билан келишувга эришилмаган тақдирда, Теҳронга қарши ҳарбий зарбалар янада кучайтирилиши мумкинлигини маълум қилди. Бу ҳақда Ахiоs нашри хабар берди.
Америка етакчиси нашрга берган интервьюсида Вашингтон Эрон билан келишувга эришишни истаётганини, бироқ Теҳрон ҳали АҚШ кутаётган позицияга келмаганини таъкидлади.
“Биз келишувга эришмоқчимиз. Улар ҳозир биз хоҳлаган нуқтада эмас. Агар муросага келинмаса, уларга янада қаттиқ зарбалар берилади”, — деди Трамп.
Ахиос маълумотига кўра, АҚШ президенти 19 май куни Эрон бўйича кейинги ҳарбий вариантларни муҳокама қилиш учун миллий хавфсизлик гуруҳи аъзолари билан учрашув ўтказишни режалаштирмоқда.
Шунингдек, нашр манбаларининг билдиришича, Трамп аввалроқ вице-президент Ж.Д.Венс, махсус вакил Стив Уиткофф, давлат котиби Марко Рубио ҳамда Марказий разведка бошқармаси директори Жон Ретклифф билан Эрон атрофидаги вазиятни муҳокама қилган.
АҚШ президенти аввал ҳам Теҳронни Вашингтон билан эҳтимолий келишув бўйича тезроқ қарор қабул қилишга чақириб, “вақт жуда муҳим” эканини билдирган эди.
Эслатиб ўтамиз, АҚШ ва Исроил 28 февраль куни Эронга қарши ҳарбий зарбалар берган. Бунга жавобан Эрон Ҳормуз бўғозини ёпганини маълум қилган эди. Кейинчалик томонлар ўртасида вақтинчалик сулҳ эълон қилинган, бироқ минтақадаги кескинлик ҳануз сақланиб қолмоқда.
