АҚШда иккита қирувчи самолёт ҳавода тўқнашиб кетди
Тўрт нафар экипаж аъзоси парашютлардан фойдаланиб самолётни тарк этган.
Айдаҳо штатида ўтказилган авиашоу вақтида АҚШнинг икки қирувчи самолёти ҳавода тўқнашиб кетди. Ҳодиса Mountain Home Air Force Base ҳудудида ташкил этилган “Gunfighter Skies” авиакўргазмасининг иккинчи куни давомида содир бўлган.
Times Now News хабарига кўра, ҳодисада Boeing F/A-18E/F Super Hornet ҳамда Boeing EA-18G Growler самолётлари иштирок этган.
Маълум қилинишича, қирувчи самолётлардан бири мураккаб манёврни амалга ошириш жараёнида иккинчи самолётга тегиб кетган. Тўқнашувдан сўнг учувчилар катапультадан фойдаланиб, самолётни тарк этган.
Гувоҳларнинг айтишича, ҳодисадан кейин осмондан тўртта парашют тушаётгани кузатилган.
Шундан сўнг самолётлардан бири ерга қулаб тушиб, портлаган. Ҳарбий база маъмурияти ҳодисани тасдиқлаб, ҳудуд вақтинча ёпилгани ва ҳолат юзасидан тергов ҳаракатлари бошланганини маълум қилган.
