Францияда Саудия валиаҳд шаҳзодасига қарши тергов бошланди
Муҳаммад бин Салмон Ол Сауд журналист Жамол Қошиқчининг қийноққа солиниши ва мажбуран йўқолиб қолишига алоқадорликда айбланмоқда.
Францияда Саудия Арабистони валиаҳд шаҳзодаси Муҳаммад бин Салмон Ол Саудга нисбатан саудиялик журналист Жамол Қошиқчининг ўлдирилиши ва мажбурий йўқолиши юзасидан суд тергови бошланди. Бу ҳақда Agence France-Presse агентлиги хабар берди.
Франция Миллий терроризмга қарши прокуратураси маълумотига кўра, инсониятга қарши жиноятлар бўлими терговчи судьяси эндиликда Trial International ҳамда “Чегара билмас мухбирлар” ташкилотлари томонидан берилган шикоят асосида иш олиб боради.
Муҳаммад бин Салмон Ол Сауд журналист Жамол Қошиқчининг қийноққа солиниши ва мажбуран йўқолиб қолишига алоқадорликда айбланмоқда.
Мазкур шикоят дастлаб 2022 йили, Саудия Арабистони валиаҳд шаҳзодасининг Францияга расмий ташрифи арафасида “Democracy for the Arab World Now” (DAWN) ва Trial International томонидан тақдим этилган эди. Кейинчалик “Чегара билмас мухбирлар” ҳам ушбу мурожаатга қўшилган.
Аввалроқ Франция прокуратураси тергов бошлашга қарши бўлган, бироқ Париж Апелляция суди 11 май куни ташкилотлар талабини қаноатлантирган.
Жамол Қошиқчи 2018 йили 2 октябрь куни Саудия Арабистонининг Истанбулдаги бош консуллигига кирганидан сўнг бедарак йўқолган эди. Кейинчалик Ар-Риёд журналист консуллик биносидаги можаро оқибатида ҳалок бўлганини маълум қилган.
2021 йили АҚШ Миллий разведка директори идораси эълон қилган ҳисоботда операция Саудия Арабистони валиаҳд шаҳзодаси томонидан маъқуллангани қайд этилган. Саудия Арабистони эса бу айбловларни рад этиб келмоқда.
