Келажаги порлоқ дея эътироф этилаётган ўзбек ММА жангчилари
Сиз улардан кимларни танийсиз?
Ўзбекистонда жанговар санъатнинг ўрнини ортиқча баҳолаб бўлмайди. Юртимизда бокс гуллаб-яшнамоқда, ўзбек боксчилари узоқ вақтдан бери жаҳон миқёсидаги мусобақаларда иштирок этиб, улкан ютуқларни қўлга киритиб келмоқда. Айтиш жоизки, Ўзбекистонда ММА спорт тури ҳам ривожланиб бормоқда. Юртимиз спортчилари аллақачон катта ташкилотларда иштирок этишмоқда. Биз Ўзбекистонда фаолият юритаётган энг кучли ММА жангчилари ҳақида тўхталиб ўтмоқчимиз.
Ўзбек ММА жангчилари Маҳмуд Муродовнинг номини жуда яхши танийди. Спортчи ўзбекистонлик жангчилар орасида энг машхури ҳисобланади. У 2019 йилдан бери UFСда жанг қилиб келмоқда. Унга спортчи бокс юлдузи Флойд Мейвезернинг таклифига биноан ўтган. Муродов UFСда учта жанг ўтказган бўлиб уларнинг иккитасида ғалаба қозонган бўлса, охирги жангида спортчи Миша Циркунов мағлуб бўлган эди.
Нурсултон Рўзибоев ҳам энг тажрибали ўзбек жангчиларидан бири ҳисобланади. Унинг профессионал жанглари сони 40 дан ошган. 2021 йилда 28 ёшли Нурсултон икки йиллик танаффусдан сўнг карерасида 6 та ғалабага эришди.
34 ёшли оғир вазн тоифасидаги Александр Столяров “АSА” ва “Open Fighting Championship” каби промоутерлик компанияларида қатнашган. Столяров 2013 йилдан буён профессионал спортчи сифатида жанг олиб бормоқда. У, асосан, МДҲда иштирок этиб келмоқда. Александр ММАда 26 ғалабани қўлга киритган.
35 ёшли ММА фахрийси Алихон Ҳасанов 2011 йилдан бери жангларда иштирок этиб келмоқда. Алихон енгил вазн тоифасида жанг қилади. Жаҳон миқёсида Ҳасанов ютуқлари билан эътироф этилмаган, аммо у кучли жангчи сифатида обрў қозонган. Ўтган йили у икки йиллик танаффусдан сўнг жанг олиб борди, аммо мағлуб бўлди.
Яна бир 35 ёшли фахрий жангчи Амин Эргашов оғир вазн тоифасида иштирок этади. Ўтган йилнинг апрель ойида Амин Ҳабиб Нурмагомедовга тегишли бўлган “Eagle FС” лигасида дебют қилган эди. У ерда жангчи 2 та ғалабани қўлга киритди.
25 ёшли ўзбекистонлик ярим ўрта вазн тоифасидаги спортчи Машрабжон Рўзибоев айни дамда фаолиятининг чўққисида. Рўзибоев фаолиятидаги 13 та жангнинг 8 тасида нокаут эвазига ғалаба қозонган. Машрабжон 2016 йилдан буён профессионал тарзда фаолият олиб бормоқда. Жангчи “Open FS”, “Brave” “SF”, “ВEF” ва бошқа ташкилотлар билан ҳамкорликда ишлаган.
Ажойиб нокаутлар билан танилган Шоҳасан Мирзаматов ярим ўрта вазн тоифаси юлдузларидан бири ҳисобланади.
Мирзаматов дебютини 2015 йилда ўтказган, бироқ кейин қамоққа тушиб, навбатдаги жангини 5 йилдан кейин ўтказган. 2021 йилда Шоҳасан 7 та ғалабага эришди.
Шоҳасан Мирзаматов, ўзбек ММА жангчилари орасида энг кучлиларидан бири ҳисобланади.
Музаффар Ражабов ҳам оғир вазн тоифасида жанг олиб боради. У 2014 йилдан буён профессионал тарзда жанг қилиб келмоқда. Сўнгги 4 йил ичида Музаффар бирорта ҳам жангда мағлуб бўлмади. Бу эса жангчига Эагле ФК билан шартнома имзолаш имконини берди. У ерда Ражабов шу кунгача 1 та жанг ўтказиб, нокаут билан ғалаба қозонган.
Азамат Нуфтиллаев дастлаб “Eagle FС” ва “Alash Pride” каби ташкилотларда чиқиш қилган. Жангчи 11 жангдан иборат ғалабали серияни қайд этмоқда. Азамат UFС жангчилари рўйхатига қўшилиши мумкин бўлган энг ёрқин ўзбек жангчиларидан бири.
Яна бир ярим вазн тоифасидаги жангчи Бобур Қурбонов 7 йилдан ортиқ профессионал кураш олиб боради. Қурбонов “М-1 Global” ва “Alash Pridе” лигаларида жанг қилгани билан танилган.
Рамазонбек Темиров — катта лигада келажаги порлоқ дея эътироф этилаётган ММА жангчиси. Спортчи ҳозирда 24 ёшда. Ўтган 9 ой ичида у 4 та ғалабали серияни қайд этган.
Муаллиф: Жамшидбек АМИРОВ
