Роналду “Ливерпул” мухлисларига раҳмат айтди

 

 

Роналду ўғлининг ўлими муносабати билан уни қўллаб-қувватлаган “Ливерпул” мухлисларига мурожаат қилди.

“Манчестер Юнайтед” ҳужумчиси Криштиану Роналду “Ливерпул” мухлисларига янги туғилган ўғлининг ўлими муносабати билан уни қўллаб-қувватлаганликлари учун миннатдорчилик билдирди.

 

“Бир дунё… Битта спорт… Битта катта оила… Раҳмат “Энфилд”. Мен ва менинг оилам бу ҳурмат ва раҳм-шафқат ишорасини ҳеч қачон унутмаймиз”, — деб ёзди Роналду ўзининг ижтимоий тармоқлардаги саҳифасида.

 

Эслатиб ўтамиз, 30-тур учрашувидан ўрин олган “Ливерпул” — “Манчестер Юнайтед” ўйини Ливерпулдаги “Энфилд” стадионида бўлиб ўтди ва 4:0 ҳисобида якунланди. Мазкур учрашувнинг еттинчи дақиқасида “Энфилд”даги мухлислар Роналдуни олқишлар билан қўллаб-қувватлашди. “Ливерпул” бош мураббийи Юрген Клопп ҳам четда турмади ва мухлислар билан бирга олқишлади. Криштианунинг ўзи оилавий аҳволи оғир бўлгани учун ўйинни ўтказиб юборди.

 

Аввалроқ, Роналду жамоадошларини танқид қилгани ҳақида хабар берилганди.

 

Жамшидбек Амиров